ˋRizgarkirina Reqayê şoreşeke mirovî ye, zarokên vê xakê bi rê ve birˊ

Şêniyên kantona Reqayê, bi şahiyekê, salvegera 8'emîn a rizgarkirina bajarê xwe ji çeteyên DAIŞ'ê bi diruşma "Sozeke nû ya ewlehî û rûmetê" pîroz kir. Di şahiyê de bi hezaran şênî û nûnerên saziyên sivîl û leşkerî yên Reqa û Tebqayê amade bûn.

Şahîd bi tûraneke leşkerî ji hêla şervanên xort û keç ên Hêzên Sûriya Demokratîk (QSD) û Hêzên Ewlekariya Hundirîn ve, hat destpêkirin.

Piştre bi navê Meclisa Leşkerî ya Reqayê fermandar Cemîl Mazlûm girîngî da yekitiya xaka Sûriyeyê û got serketina li Reqayê serketina tevahî Sûriyeyiyan e.

Hevserokê Meclisa Rêveber a kantona Reqayê Meşleb El Turkan bi navê Rêveberiya Xweseriya Demokratîk bixêrhatina gel kir û got: "Di vê rojê de di dîrokê de rûpeleke nû hat nivîsandin. Di vê rojê de îradeyê teror têk bir, heqiyê neheqî têk bir û rûmetê zordarî têk bir."

El Turkan diyar kir ku pêngava rizgarkirina Reqayê ne tenê operasyoneke leşkerî bû, ew şoreşeke mirovî bû ku zarokên ve xakê ên QSDˊê û YPJˊê ew da meşandin.

El Turkan destnîşan kir ku îro Sûriyeyê di werçerxeke dîrokî re derbas dibe û hîna çareserî jî dûr e, lê yekitiya Sûriyeyê bi naskirina tevahî pêkhateyan, rêzgirtina taybetmendiyên wan û beşdariya wan di biryaran de pêkan e. El Turkan got: "Ezmûna Rêveberiya Xweser îsbata zindî ya vê yekê ku demokrasî dikare pêk bê û rêveberiya nenavendî çareserî ye."

Hevseroka Desteya Malbatên Şehîdan a kantonê Zehra Yûsif jî axivî û salvegera rizgarkirina Reqayê pîroz kir û got: "Ev ne tenê serkeftina leşkerî bû, lê serkeftina jiyanê û vejîna nû ya giyanê mirovê Sûriyeyî yê ku îhanet û koletî redkirî ye."

Zehra Yûsir anî ziman ku fedakariyên şehîdan ne tenê salvegera derbaskirinê ye, lê sozeke di dilê tevan de ye ku rêya têkoşînê heta pêkanîna aştî û azadiyê bidomînin.

Koordînatora Meclisa Kombûna Jinan a Zenûbiya Cîhan Mihemed jî peyamek da û got: "Di pêngava rizgarkirina Reqayê de jin hevkareke sereke bûn. Rizgarkirina xakê destpêka têkoşîneke demdirêj e, ji ber ku zehmetiya heyî avakirina Sûriyeya nû ya demokratîk û nenavendî ye. Pêwîst e di vê pêvajoyê de, di jin di destûr û biryardayînê de cihê bingehîn bigirin."

(mh/fr)

ANHA