‘YPJ şerekî nû yê hebûnê dike, em jî piştgiriya wê dikin’

Mijara naskirina Yekîneyên Parastina Jinan (YPJ) wek hêzeke leşkerî di nava Wezareta Parstinê ya Sûriyeyê de, her wiha garantîkirina mafên destûrî yên jinan, bûye rojeveke siyasî  û civakî.

Der barê mijarê jina bi navê Xalîde Botî a ji Hesekê got YPJ 15 sal e beşeke girîng a şoreşê ye û destnîşan kir ku ev hêz nûnertiya jinan dikin û maf û hebûna wan diparêzin. Xalîde diyar kir ku şervanên jin li dijî çeteyên DAIŞ`ê şer kirine û qurbaniyên mezin dane û da zanîn ku nenaskirina wan di destûrê de tê wateya paşguhkirina rola jinan li Sûriyeyê.

Xalîde Botî rexne li helwesta hikumeta demkî ya li ser YPJ`ê kir û got: "Ev yekîne hêza me û hebûna me ne."

Xalîdeyê diyar kir ku divê di destûra nû ya Sûriyeyê de roleke pêşeng û fermî ji YPJ`ê re were dayîn û ew wekî lîwayek yekgirtî di nav saziyên leşkerî de werin naskirin.

Jina bi navê Beyan Xelîl jî narazîbûna xwe ya li dijî nenaskirina YPJ`ê nîşan da û diyar kir ku jin dê heta ku mafên xwe yên tevahî bi dest bixin, piştgiriyê bidin van hêzan.

Beyanê sedemên ku rê li ber naskirina YPJ`ê digirin pirsî û diyar kir ku ew nasname û hebûna jinan temsîl dikin. Beyan diyar kir ku YPJ`ê di şerê li dijî çeteyên DAIŞ'ê û parastina destkeftiyên herêmê de roleke girîng lîstiye û da zanîn ku têkoşîna ji bo misogerkirina mafên wan ên destûrî dê berdewam bike.

Fatma Kelaş diyar kir ku YPJ beşeke dîrok û nasnameya herêmê ye û bal kişand ser rola wan a sereke di şerê li dijî DAIŞ'ê û parastina herêmê de. Beyanê got yekîneyên wan niha şerekî din ê hebûnê dimeşînin da ku naskirina xwe ya fermî û destûrî misoger bikin.

Fatmayê diyar kir ku van hêzan hebûna xwe di şerên cuda de yên ku li herêmê qewimîne, îspat kiriye û naskirina wan di nav destûrê de pir girîng e. Ev yek ji bo ninan daxwazeke bingehîn e.

(k)

ANHA