Xwediyên patozan amadekariyên çinînê dikin

Bi nêzîkbûna demsala çinînê li herêma Cizîrê re, cotkarên li devera Aliyan a gundewarê Çilaxayê pêdiviyên çinînê yên wekî çiwal, ben û amûrên din ji bo berhevkirina berhemên genim û ceh amade dikin. Xwediyên patozan jî patozên xwe amade dikin.

Ji destpêka Gulanê ve, xwediyên patozan patozên xwe amade dikin. Xwediyên patozan pergalên elektrîkî û mekanîkî yên patozan kontrol dikin, da ku ji bo xebitandinê amade bin û di dema çinînê de xera nebin.

Fewaz Beşîr, xwediyê patozekê ye li gund Xirbê Cihûyan, diyar kir ku  ew zêdetirî bîst salan e di vî warî de dixebite û destnîşan kir ku ew di mehên havînê de karê xwe yê ajokariyê li ser rêya Qamişlo-Dêrik dihêle da ku xwe ji bo demsala çinînê vala bike.

Beşîr got ku xebatên lênêrîn û amadekirina patozan di destpêka Gulanê de dest pê dike û nêzîkî mehekê berdewam dike. Di vê demê de hemû beşên patozê tên kontrolkirin û bi tevahî tê amadekirin da ku di dema xebitandinê de xera nebe.

Beşîr da zanîn her şaşiyek elektrîkê an çirûseke agir ji patozê di dema çinînê de dikarin bibin sedema şewatê û windakirina hem berhem û hem patozê.

Beşîr destnîşan kir ku werşeyên kar hatine amadekirin û barkêş, aşpêj û ajokar hatine peydakirin û got, xebata lênêrînê di qonaxên xwe yên dawîn de ye û tê payîn ku çinîna ceh di dawiya vê mehê de dest pê bike.

Beşîr da zanîn ku paydakirina mazota erzan ji bo patozan dê barê darayî yê xwediyên patozan û cotkaran sivik bike.

Beşîr bang li rayedarên pêwendîdar kir ku piştgiriyê bidin sektora çandiniyê û sotemeniya erzan peyda bikin.

(k)

ANHA