Xelkê Tirbespiyê 73 şehîd bi bîr anîn

Xelkê Tirbespiyê di merasîma bîranîna 73 şehîdan de got ew bi israr in li dijî tevahî plan û êrişên bi hewldana tirsandina wan û çewisandina şoreşa wan bisekinin.

ROJANE

29 cotmeh, 2023 15:05

QAMIŞLO

Meclisa Malbatên Şehîdan a Tirbespiyê ji bo bîranîna 73 şehîdên di mehên Tebax, Îlon û Cotmehê de li cihên cuda şehîd bûbûn de merasîm li hola Partiya Yekitiya Demokratîk (PYD) a li navçeyê li dar xist.

Bi beşdariya bi dehan xelkê navçeyê ji tevahî pêkhateyên wê merasîmê dest pê kir. Dûre sînevîzyonek li ser jiyana şehîdan, wêneyên wan û nirxandinên Rêber Abdullah Ocalan ên li ser rola şehîdan hate pêşandan.

Girêdayî mijarê endama rêveberiya Meclisa Navçeya Tirbespiyê Aryan Cûdî axivî û got: "Pêkhateyên herêmê îsbat kir ku ew ji tevahî plan, komplo û êrişên hovane yên bi armanca şikandina vîna wan û terikandina berxwedanê, bi hêztir in."

Aryan di dawiyê de got: "Yekitiya van pêkhateyan û berxwedana wan bi rêya tevlêbûna xwîna keç û xortên herêmê ji Kurd, Ereb û Suryan pêk hat. Ev jî teqeziyê bi projeya neteweya demokratîk û biratiya gelan dike ku hêzên mêtinger li ser xwe xeteriyekê dibînin."

Merasîm bi xwendina wesîqeyên şehîdan û radestkirina ji malbatên wan re bi dawî bû.

(fr)

ANHA