Xelkê Helebê şehîd Merwan spart axê

Xelkê taxên Şêxmeqsûd û Eşrefiyê yên Helebê cenazeyê endamê Hêzên Ewlekariya Hundirîn şehîd Merwan (Mihemed Mistefa) ê ku di encama nexweşiyekê de li ser erka xwe şehîd bûbû, defin kir.

Şênî, endam û nûnerên partiyên siyasî û saziyên sivîl li pêş berada şehîdan a li herêma Şiqeyfê kom bûn û cenazeyê şehîd re ber bi Pakrewangeha Şehîdên Berxwedana Taxên Şêxmeqsûd û Eşrefiyê ve ketin rê.

Li pakrewangehê, hevseroka Meclisa Malbatên Şehîdan Remziye Şêx Salih axivî û got: "Bi berxwedanekê ku têkçûyînê nas nake şehîd Merewan li Şehba û Helebê tê koşiya. Ew bavê du şehîdan e. Wê fedakariyên wî her zindî bin."

Dûre rêveberê Hêzên Ewlekariya Hundirîn Mihemed Xelîl jî got: "Ji malbateke welatparêz û bavê du şehîdan, şehîd Merwan jiyana xwe di xizmetî doz û gel de terxan kir."

Her wiha keça şehîd Merwan, Hûriya Mistefa axivî û got: "Bavê me, em fêr kirin ku îxanetê li dozê nekin, ji xaka xwe re wefadar bin. Bavê min digot heta ne bi al û rûmet be em venagerin Efrînê, di heman demê de divê dagirker û çeteyên wê werin têkbirin."

Di dawiyê de endama Meclisa Malbatên Şehîdan Zelûx Şêx Qember wesîqeya şehîd xwend û radestî malbatê kir. Cenaze bi tilîliyên dayikan hate definkirin.

(fr)

ANHA