Xebatên ji nû ve avakirina nexweşxaneya Nîştimanî ya Reqayê gihîştin ku derê?

Bi armanca pêşkêşkirina alîkariya tenduristiyê û pêşwazîkirina hejmara herî zêde ji nexweşan li Reqayê, Komîteya Tenduristiyê ya Reqayê di 25'ê Tîrmeha îsal de projeya ji nû ve amadekirin û berfirehkirina nexweşxaneya Niştîmanî ya Reqayê ya kevin û ya nû dest pê kir.

Nexweşxaneya Niştîmanî ya Reqayê piştî kontrolkorina çeteyên DAIŞ'ê li ser Reqayê hatibû wêrankirin û di encama şer de beşên mezin ên nexweşxaneyê bi temamî hatin rûxandin.

Piştî rizgarkirina Reqayê Rêveberiya Sivîl a Demokratîk a Reqayê hewl da nexweşxaneya Niştîmanî ji nû ve çalak bike û di sala yekemîn piştî rizgarkirinê de nexweşxane çaksaz kir û gelek beş tê de vekirin.

Niha jî, li nexweşxaneya Niştîmanî ya Reqayê 4 qat û gelek beş hene; di qatên yekemîn û duyemîn de beşên sarinc û morg, fizyoterapî, ambûlans û emeliyatan hene. Qatên sêyemîn û çaremîn jî ji odeyên nexweşan pêk tên.

Endamê Komîteya Çavdêriyê ya ji nû ve amadekirina nexweşxaneyê endezyar Mihemed El Edad wiha axivî: "Komîteya Tenduristiyê bi hevkariya şîrketa Şemal dest bi ji nû ve amadekirina nexweşxaneya Niştîmanî ya kevin û ya nû kir û ji bo bidawîbûna projeyê 5 meh dem hat diyarkirin."

Cîgirê hevseroketiya Komîteya Tenduristiyê Ebdurezaq El Elî got: "Armanc ji vê projeyê sivikkirina barê welatiyan di aliyê madî de ye. Ji ber zêdebûna hejmara nexweşan û zêdebûna rêjeya niştecihan li Reqayê Komîteya Tenduristiyê biryara berfirehkirin û ji nû ve amadekirina nexweşxaneyê da."

El Elî di dawiya axaftina xwe de got: "Di encama vê berfirehkirinê de hemû beşên nexweşxaneyê dê bên berfirehkirin. Lêçûna vê projeyê 698 hezar dolar e û rêjeya temambûna xebatên çaksazî û ji nû ve amadekirinê heta niha ji sedî 90 e. Tê payîn destpêka sala 2024'an proje bi temamî biqede."

(mh/şx)

ANHA