Siwêdayiyan piştgiriya xwe bi peymana QSD’ê ya li Şamê re nîşan da

Îro li bajarê Siwêdayê çalakiyeke hevgirtin û piştgiriya peymana ku di navbera Fermandarê Giştî yê Hêzên Sûriya Demokratîk (QSD) Mazlûm Ebdî û serokê desthilata Şamê Ehmed El Şerî de hatiye îmzekirin, li qada Keramê hat lidarxistin. Di çalakiyê de pankartên "Sûriye yek e û tevahî Sûriyeyiyan e", "Ji Cizîrê heta bi peravê, ji bakur heta bi başûrê gelê Sûriyê yek e" hatin hildan.

Beşdaran di çalakiyê de banga dûrketina ji fitneya taîfî da û got Sûriye bû yek û êdî ne bakur an jî başûr heye, lê tenê yek blok e û di bin ala Komara Sûriyeyê de ye.

Ji beşdaran Usama Beşnaq got: "Ji qada Keramê, em deqeyeke rêzgirtin li ser ruhê qurbaniyan û xelkê me yê peravê û endamên Hêzên Ewlehiyê sekinîn."

Beşnaq wiha domand: "Em îro bi peyamana dîrokî ya di navbera Kurdên azadîxwaz bi nûnertiya birêz Mazlûm Ebdî û birêz Ehmed El Şeri de hatiye îmzekirin, roja serkeftina mezin, pîroz dikin. Ev yek nîşaneya xwestekên sûriyeyiyên azadixwaz e. Em yek gel in û dixwazin xaka Sûriyeyê di bin yek banê de be."

Beşnaq di berdewama axaftina xwe de wiha got: "Em ê serdana herêmên Kurdan bikin û ji wan re bêjin serî xwe hilde jor tu Sûriyeykî/e azad î. Hezar car ji gelê Sûriyeyê re pîroz be. Silavên taybet ji xelkê bakur re der barê berxwedan û fedakariyên wan de."

(fr)