Serhildana Wanê ya dijî zextan mezin dibe

Li bajarê Wanê yê Bakûrê Kurdistanê, piştî ku desthilatdariya AKP-MHP’ê xwest şaredariya ji aliyê DEM Partî ve hatiye qezençkirin desteser bike, gel rabû serhiladanê. Xwepêşandana gel îro jî didome.

3 nîsan 2024 12:18

WAN

Di hilbijartinên şaredariyan ên 31’ê Adara 2024’an ku li Bakûrê Kurdistanê û Tirkiyeyê pêk hatibûn de, DEM Partiyê serkeftineke mezin bidest xistibû. Li bajarê Wanê jî DEM Partî tevahiya şaredariyan (14 şaredarî) bidest xistibûn.

Lê piştî hilbijartinê, mezbeteya Hevşaredarê Şaredariya Bajarê Mezin ê Wanê Abdullah Zeydan ê ji DEM Partiyê nehat dayîn. Li şûna wî mezbeta dan namzetê AKP’ê. Li ser vê yekê duh bi hezaran kes daketibûn kolanan û dijî zordariyê serî hilda.

Çalakiyên gelê Wanê îro jî berdewam dikin. Li gorî nûçeya Ajansa Nûçeyan a Mezopotamyayê (MA), li tevahiya bajar dikan nehatin vekirin. Gel ji 7 cihên cuda yên bajar dest bi meşê kir û dirûşmeyên “Abdullah Zeydan rûmeta me ye” berz dikin.

Li hinek cihan hêzên dewletê bi bombeyên gazê êrîşî xwepêşandanan dikin, lê welatî jî bendan ava dikin û bersiva wan dikin.

Herîkina gel a nava bajar û serhildan berdewam dike.