Şêniyên Hesekê komkujiya Musterîhayê şermezar kir

Duh bi şev, dewleta Tirk a dagirker komkujiyek hovane li gundê El Musterîha yê bajarê Eyn Îsa yê kantona Firatê pêk anî, di encamê de 12 kes şehîd bûn ku 6 zarok jê zarok bûn. 

Endama Meclisa Malbatên Şehîdan a bajarê Hesekê yê kantona Cizîrê Necah Hewas ev komkujî bi tundî şermezar kir û got: "Komkujiya dewleta Tirk a dagirker li dijî sivîlan ne ya yekem e, her tim zarok û jin dibin qurbaniyên van êrişan. Sûc û tawanên dewleta Tirk nayên hijmartin. "

Necah her wiha got: "Êrişên dagirkeriya Tirk ên li ser herêmê dewam dikin, ev jî armanca dagirkeriyê ya têkbirina aramiyê û hedefgirtina welatiyan aşkera dike.”

‘SÛCEKÎ MEZIN LI DOSYEYA SÛCÊN DEWLETA TIRK ZÊDE BÛ’

Endamê Meclisa Malbatên Şehîdan a Hesekê Xelîl Seîd destnîşan kir ku komkujiyên dewleta Tirk a dagirker bi giranî jin, zarok û deverên niştecihbûnê dikin armanc. Seîd got û ev yek binpêkirineke aşkera ya zagonên navneteweyî ye.

Seîd wiha dewam kir: "Tişta ku li gundê Musterîha qewimî, sûcekî hovane ye ku li dosyeya sûcên dewleta Tirk zêde bûye. "

JI HÊZÊN NAVNETEWEYÎ BÊDENGÎ

Xelîl Seîd di dawiya axaftina xwe de bang li hêzên navneteweyî û rêxistinên mafên mirovan kir ku ji bo parastina sivîlan û rawestandina sûcên dewleta Tirk a dagirker bi lez destwerdanê bikin û got: "Eger hesab ji dewleta Tirk nayê pirsîn, ev yek wê bihêle ku komkujiyên zêdetir pêk bîne. "

(k)

ANHA