Şêniyên Dêrikê şehîd Rênas Serhed oxir kir

Bi sedan şêniyên bajarên Dêrikê, Girkê Legê û Çilaxayê îro cenazeyê şervanê QSD`ê Rênas Serhed (Hiseyn Elî) li Pakrewangeha Şehîd Xebat a li Dêrikê spart axê. Rênas Serhed di 25`ê vê Cotmehê de dema ku li Qamişloyê erka xwe ya leşkerî pêk dianî, şehîd bûbû.

Merasîmê bi deqeyeke rêzgirtinê dest pê kir, piştre endama Meclisa Malbatên Şehîdan Fatma Hemîd axivî û diyar kir ku divê rêya şehîdan were berdewamkirin û têkoşîna wan were şopandin.

Serokê Komeleya Ehlê Beytê ya Bakur û Rojhilatê Sûriyeyê şêx Sînan Seydoş jî bal kişand ser hesasiyeta rewşa heyî û banga dilsoziya bi xwîna şehîdan re kir û soza berdewamiya rêya wan da. Seydoş got: "her şehîdek sembola berxwedan û qehremaniyê ye, û îrade û ramanên wan şoreşek gelêrî li dijî kapîtalîzm û rejîmên zalim ava kir."

Ji fermandarên QSD`ê Mihyedîn Xêrikê jî axivî û diyar kir ku hevalên şehîd dê têkoşîna ji bo parastina gel dewam bikin û planên dijminane yên li dijî civakê têk bibin. Xêrikî destnîşan kir ku şehîd Rênas mînakek aştiyê bû û jiyana xwe ji bo xizmetka civaka xwe terxan kir.

Piştî xwendina belgenameya şehadetê cenazeyê şehîd bi dirûşman spartin axê.

(k)

ANHA