Şaredariya Girkê Legê xebatên xwe nirxandin û plansaziya sala bê danî

Şaredariya Gel a bajarê Girkê Legê yê kantona Cizîrê civîna xwe ya salane li dar xist. Di civînê de kar û xebatên ku di 2025’an de hatine kirin û danîna plansaziya xebatê ya sala bê hatin nîqaşkirin.

Civîn bi deqeyeke rêzgirtinê dest pê kir, paşê hevseroka şaredariyê Gulnar El Hisên rewşa giştî ya herêmê nirxand û giringî da pêşxistina xizmetguzariyan di pêkanîna hewcedariyên şêniyan de.

Girêdayî mijarê, rapora salê hat xwendin û tê de behsa xebatên qîrkirina rêyan, başkirina rewşa xizmetguzarî li bajêr û avakirina konalîzasyonan, hat kirin.

Paşê, endamê rêveber ê Partiya Yekîtiya Demokratîk (PYD) Mela Şerîf li ser rewşa siyasî ya Herêma Bakur û Rojhilatê Sûriyeyê axivî û destnîşan kir ku sîstema nenavendî û Rêveberiya Xweser çareseriya herî guncaw ji bo misogeriya edalet û jiyana hevbeş di nava pêkhateyan de ye.

Şêwirmenda Şaredariyên Herêma Bakur û Rojhilatê Sûriyeyê Zeyneb Murad di civînê de diyar kir ku divê şaredariya Girkê Legê bi hemû karker, beş û şaxên xwe kar û erkên ku ji bo wê hatine destnîşankirin pêk bînin, xizmetan pêşkêş bikin û pêdiviyên bingehîn ên şêniyan dabîn bikin.

Piştre bi rêya sînevizyonekê xebatên par hatin pêşkêşkirin. Beşdaran jî rêbazên pêxşistina xebata şaredariyê û geşkirina hevkariyê di nava komîteyan de ji bo xebata sala bê pêşniyar kirin.

Xelkê Girkê Legê ji şaredariyê daxwaz kir ku girîngiyek zêde bi bajêr, xizmetguzariyên paqijiyê û qîrkirina rêyan pêşkêş bike.

Civîn bi danîna plansaziya sala bê wek qîrkirina hîn rêyan û destpêkirina xebatên sererastkirina kanalîzasyonan, bi dawî bû.

(ac/fr)

ANHA