Şaredariya Çilaxayê li pêşniyarên şêniyan guhdarî kir

Şaredariya Gel a bajarê Çilaxa ya kantona Cizîrê bi şêniyên bajar û gundan, komîteyên xizmetguzarî yên komînan re civiya û xebatên xwe yên dawîn ji wan re şîrove kirin. Her wiha li pêşniyarên wan ên ji bo sala 2025`an guhdarî kir. 

Şaredariyê civîn li hola Partiya Yekitiya Demokratîk (PYD) li dar xist. Hevseorkê komînên bajêr, komîteyên xizmetguzariyê, endamên şaredariyê û daîreya avê tev li civînê bûn.

Hevserokê şaredariyê, Feylsel Hesen axivî û got: "Her sale m bi xelkê xwe re dicivin ji bo ku li pêşinyarên wan guhdar bikin, ji Meclisa Rêveber a Desteya Şaredariyan re ragihînin û wê li ser plansaziya 2025`an zêde bikin."

Hesen wiha domand: "Di encama êrişên dewleta Tirk a dagirker de, derengmayîna şîrketê di meşandina kar de û hatina zivistanê, piraniya projeyên di plansaziya 2023`yan de yên girêdayî rêya, avê, kanalîzasyonê dest pê nebûne. Tevahî kar rawestiya û heta havîna 2024`an hatin taloqkirin."

Hesen da zanîn ku li ser pêşniyarên şêniyan di civîna sala 2023`yan de, torên kanalîsazyonê yên şaxî yên taxa Xesan Kenefenî bi dirêjahiya hezar metre û lêçûna 17 hezar û 647 dolarî dest pê kiriye û ji sedî 90`ê wê temam bûye. Têkildarî trafîkê Hesen anî ziman ku şaredariyê peyareyek li kolana giştî bi dirêjahiya 2 kîlometreyan û lêçûna 55 hezar û 673 dolarî li têketina bajêr a ji milê rojhilat û rojava, ava kiriye.

Der barê projeyên Daîreya Avê ya Şaredariya Gel de, li gorî Hesen diyar kir ku şaredariyê, tora avê li gundê Emarat ê rojilatê bajêr bi dirêjahiya 600 metreyî û lêçûna 6 hezar dolarî bi cih kiriye.

Hesen wiha pê çû: "Ji bo rewşên awarte jî, bîr hatin kolandin. Daîreyê 5 xatasên avê bi lêçûna 8 hezar dolar kirîn. Şaredariyê kolana giştî; ji têketina bajêr a rojhilat heta dawiya têketina bajêr li aliyê rojava ronî kir.

Hesen aşkera kir ku destpêka vê mehê, şaredariyê yekemîn projeyên xwe yên ji bo sala 2024`an kir. rêya ji gundê Hemra El Xemir heta rêya navneteweyî zift kir. di rojên bê de dê projeyên kanalîsazyonê û ziftkirina rêyan li bajarê Çilaxa temam bike û tora avê firehtir bike. Dawiya vê mehê, dê dest bi tevahî projeyên sala 2023 û 2024 bikin."

Dûre, şêniyan nêrîn û pêşniyarên xwe parve kirin ku piraniya wan li ser firehkirina torên kanalîzasyonê, ziftkirina rêyan, torên avê li gundan. Beşek jê dê îsal dest pê bibin û beşek jî li plansaziya 2025`an zêde bû.

Çaverêye ku şaredarî mîna vê civînê, li bajarokên Çilaxa, Abra, Kîşk, gundan werin lidarxistin û li pêşniyarên şêniyan bê guhdarkirin.

(şx)

ANHA