Dayika zarokê birîndar detayên êrişa li Dêrazorê aşkera kirin

Hêzên hikumeta Şamê û çeteyên "Dîfa Watanî" duh êvarê û vê sibê bi çekên giran û sivik  êriş bajar û bajarokên rojhilatê kantona Dêrazorê kirin û di encamê de 2 sivîl şehîd bûn û 7 jî birîndar bûn.

Hêzên Sûriya Demokratîk (QSD) têkildarî êrişê daxuyanî da û ragihand ku di êrişê de 2 sivîl şehîd bûne û 7 jî birîndar bûne.

Di nava birîndaran de 2 zarok hene. Yek ji wan bi navê Ehmed El Xelîl (9) e ku ji bajarokê Ebû Hemam e. El Xelîl li nexweşxaneya Hecîn tê dermankirin. Dayika wî Fatme Mihemed ku ji herêma El Bû Omer a rojavayê Firatê koçber bûye û li bajarokê bi cih bûye detayên êrişê wiha vegotin: "Ez û malbata xwe rûniştibûn. Ji nişkan ve êrişê dest pê kir."

Fatme wiha domand: "Saet 5:30 bû, topek li mala me ket. Zarok û hevjînê min birîndar bûn. Baş e ku birîna wan sivik e. Lê ya Ehmed girantir e. Me bi alîkariya cîranan Ehmed bir nexweşxaneya Hecînê."

Di dawiyê de Fatme bi dilşewat got: "Gunehê me çi ye. Em ji herêmên rejîmê revîn ji bo ku xwe û zarokên xwe ji mirinê û topbaranê biparêzin. Lê dîsa jî mirin li dû me bû. Ev komên çekdar çi ji me dixwazin, çima êriş herêmên me dikin?"

(şx)

ANHA