Rexne wêjeyê bi pêş dixe

Wêjeya rasteqîn hêza xwe ji rexneyê werdigire. Ji ber ku rexne rê li ber pêşketina wê vedike, her wiha tevgera wêjeyê xurt dike ku wê dewlemend dike û bi pêş dixe. Li kêlek wê jî rola rexneyê di avakirin û afirandina wêjeya nûjen de girîng e.

Di çalakiyên ˊHefteya Wêjeyêˊ yên roja 5ˊan de ku li Hotêla Êndîwar a Dêrikê yê kantona Cizîrê hatin lidarxistin de rojeva taybet li ser rexneya wêjeyê bû. Endamê Dîwana Wêjeyê ya Herêma Bakur û Rojhilatê Sûriyeyê Menhel Xelef li ser rola girîng a rexneyê di wêje û girîngiya wê de axivî.

Xelef diyar kir ku pêşniyarkirina mijara rexneya wêjeyê di Hefteya Wêjeyê de girîng e. Ji ber ku ew wêjeyê bi pêş dixe.

Xelef wiha domand: "Bi pêşketina teknolojiyê re di wêjeyê de pêşketinek berbiçav çêbû û bi wê re teoriyên wêjeyê bi pêş ketin. Wê yekê jî hişt wêje bi pêş bikeve û baş be. Rexneya wêjeyê jî deriyekê girîng a pêşketina zimanan bi giştî, bi taybet jî zimanê Kurdî ye."

Xelef anî ziman ku rexneya wêjeyê di têgihîştina xebatên wêjeyî û analîzekirina wan de dibe alîkar û wiha pê de çû: "Di çalakiyên Hefteya Wêjeyê yên salên borî li Kobanê û Qamişlo hatibûn lidarketin de, semînerên danasînê li ser rexenay wêjeyê hatibûn pêşkêşkirin. Ev rexne jî ji bo pêşketina xebatê girîng bûn. Gelek pirtûkên Kurdî li ser refikan mane, nehatine xwendin û naverokên wan nehatine aşkerakirin. Divê rexnegir bişopînin û nêrên xwe pêşkêş bikin."

Menhel Xelef di dawiyê de got rexneya wêjeyê çavê civakê ye û bi rexneyê wêjeya Kurdî bi pêş dikeve û xurt dibe.

Rexneya wêjeyê girîngiyê dide nivîsên wêjeyê, da ku taybetmendiyên başbûn û nebaşûnê aşkera bikin. Her wiha xwe dispêre naverok, wate, gotin û rexneyê. Rexne li nebaşiyên di nivîsa wêjeyê de nagire.

(fr)

 ANHA