Rêveberiya kantona Cizîrê banga tevlêbûna cejna Akîto kir

Bi boneya Cejina Ekîto (1`ê Nîsan) Meclisa Rêveber a Rêveberiya Xweseriya a Demokratîk li kantona Cizîrê li pêşiya çerxerêya Şehîdên Sêfo ya li bajarê Qamişlo daxuyaniyek da.

Li cihê daxuyaniyê nûnerên ji deste û saziyên Rêveberiya Xweser a Kantona Cizîrê yên Kurd, Ereb û Suryan, endamên saziyên Suryanî û saziyên civaka sivîl amade bûn. Her wiha Suryan û Kurd bi cil û bergên xwe yên gelêrî beşdarî daxuyaniyê bûn.

Daxuyanî bi zimanê Suryanî, Kurd û Erebî, ji aliyê Endama Partiya Yekîtiya Suryanî Mariya Hena, Hevserokên Meclisa Rêveber a Rêveberiya Xweser a Demokratîk li Kantona Cizîrê Hesen Şero û Vîviyan Biho Osê ve hate xwendin.

Di daxuyaniyê de hate gotin: "Bi navê Rêveberiya Xweser a Kantona Cizîrê, bi boneya sersala Aşûrî-Babilî (Akîto 6775) em pîrozbahiyên xwe pêşkêşî gelê me yê Suryan-Aşûrî û hemû gelên herêmê dikin.”

Rêveberiya Xweser tekez kir ku ew pabendî "parastina cihêrengiya neteweyî û olî li herêmê" ye û bang li hemû pêkhateyên herêmê kir ku mil bi mil bi boneya cejna Akîto beşdarî pîrozbahiyan bibin.

Di dawiya daxuyaniyê de hate gotin: “Sala nû li gelê me yê Suryan-Aşûrî û li hemû gelên herêmê pîroz be, bi hêviya ku ev sal bibe sala aştî, aramî û bextewariyê ji bo hemû gelên herêmê.”

(k)