Projeya xanan a li Girê Sûwer li benda çareseriyê ye

Projeya avakirina axûrên (xanên) pez li nêzî gundê Girê Sûwer ê rojavayê bajarê Tirbespiyê hêj jî ji hêla gel ve redkirî ye. Şêniyên gelek gundên derdorî ji ber bandorên jîngehê û tenduristiyê yên projeyê metirsîdar in. Şaredariya Gel a Qamişloyê jî diyar kir ku ew li gorî çarçoveyên qanûnî û îdarî projeyê pêk tînin.

Proje ew e ku wê zêdetirî 300 xanên pez û depoyên xizmetguzariyê li rûbera 650 donimê erdê nêzî gundê Girê Sûwer were avakirin. Armanca vê yekê veguhestina xanên heyî ji herêma Cemaya bo cihekî nû ye.

Şêniyên gundên Girê Sûwer, Sîhaya Mezin, Xerîcik û Xizne dibêjin ku ev proje wê bibe sedema zirarên jîngehî û tenduristî yên li gundên derdorê. Ew daxwaz dikin ku bi rêya diyalogê bi saziyên têkildar re çareseriyên lihevkirinê werin dîtin.

Hejmarek şêniyan destnîşan kir ku beşek ji erdên ku ji bo projeyê hatine veqetandin, ya wan e. Wan diyar kir ku ew xwedî belgeyên ku xwedaniya wan a li ser wan erdên îspat dikin û wan ew belge ji bo lêkolînê şandine saziyên eleqedar.

Biryara danîna kevirê bingehîn ê projeyê di 13'ê Hezîrana vê salê de hatibû kirin. Lê bertek û dijberiya niştecihan bû sedema rawestandina kar û şandina dosyeyê bo parêzgehê û Rêveberiya Çandiniyê ji bo lêkolînkirinê.

Ajansa me serdana gund û bi welatiyan re hevdîtin kir. Welatî Mesûd Evdê diyar kir ku dijberiya niştecihan ne tenê li ser meseleya xwedaniya erdê ye, belkî nêzîkbûna projeyê li herêmên niştecihî jî dikeve nav vê dijberiyê. Evdî bal kişand ser vê yekê ku dûrahiyên navbera xanan û gundên derdorê ne li gorî pîvanên ku di vî warî de têne bikaranîn.

Evdê wiha li axaftina xwe zêde kir ku niştecih piştgirî didin pêkanîna projeyên karûbarî û pêşkeftinê yên ku xizmeta herêmê dikin. Lê ew projeyên ku dibînin dibe ku bandoreke neyînî li ser jîngehê û tenduristiya niştecihan bikin, red dikin. Ew amade ne ku bi saziyên têkildar re hevkariyê bikin, heke cîh ji bo projeyên karûbarî yên din were veqetandin.

Welatî Mihemed Selîm jî got ku gundê Girê Sûwer di navbera 5 gundan de cih digire. Bandorên neyînî yên muhtemel ên projeyê dê ne tenê li ser yek gundî be, belkî dê gelek niştecihiyên derdorê jî bigire nav xwe.

Selîm daxwaz kir ku çareseriyeke lihevkirinê were dîtin ku berjewendîyên hemû aliyan li ber çavan bigire. Selîm bang li pêkanîna projeyên karûbarî û pêşkeftinê kir ku hewcedariyên herêmê bi cih bînin û ji aliyê niştecihan ve bêne qebûlkirin.

Li aliyekî din jî, Şaredariya Gel a Qamişloyê jî diyar kir ku ew li gorî daxuyaniya xwe ya fermî ya berê mijûlbûna bi mijarê de dewam bike. Şaredariyê destnîşan kir ku ew di nav çarçoveya qanûnî û rêveberî de û li gorî berjewendiya giştî tev digere.

Şaredariyê di daxuyaniya xwe de da zanîn ku ew ê di bicihanîna erkên xwe de li gorî qanûn û rêbazên heyî berdewam bike. Ew xwe dispêre rêbazên qanûnî di pêkanîna projeyên karûbarî de û ew li hember berpirsiyarên xwe yên gav bi paş ve neavêje, ji ber ku gotinên tên kirin bê delîl û îsbat in.

Niştecih û saziyên têkildar li bendê ne ku encamên lêkolîna dosyeyê ji aliyê parêzgehê û Rêveberiya Çandiniyê ve derkevin. Di heman demê de daxwaz hene ku çareseriyeke ku li berçavgirtinên jîngehî û qanûnî û berjewendiya giştî ya hemû aliyan misoger bike, were dîtin.

(fr)

ANHA