Pirtûka "Azadî dê ser bikeve" li şêniyên Minbicê hatin belavkirin

Di çarçoveya pêngava navneteweyî ya ji bo azadiya fîzîkî ya Rêber Abdullah Ocalan de Desteya Çand û Hunerê ya kantona Minbicê ji bo danasîna pirtûka "Azadî dê ser bikeve" ya nivîskar Sean Michael Wilson çalakiyek li dar xist.

Çalakî li Navenda Çand û Hunerê ya ya li bajêr hate lidarxistin. Endamên Rêveberiya Xweseriya Demokratîk a kantona Minbicê, desteyên wê, nûnerên partiyan, rêxistinên civaka demokratîk, rûspî û gelek rewşenbîr tev lê bûn.

Hevserokê Yekitiya Rewşenbîran a Kantona Minbicê Ehmed El Yusif nivîskarê pirtûkê bi beşdarên civînê da nasandin.

Hevseroka Desteya Çand û Hunerê ya kantonê Rûla Osman jî diyar kir ku nivîskar di pirtûka xwe ya bi navnîşan "Azadî dê ser bikeve" de, jiyana Rêber Abdullah Ocalan wek roman nivisiye û bi rêbazekî balkêş vîn û berxwedana wî ya ji bo azadiyê vegotiye.

Endamê Însiyatîfa Ji bo Azadiya Rêber Abdullah Ocalan a Sûriyeyê Mihemed Husam El Şewax jî got belavkirina pirtûkê beşeke pêngava ji bo azadiya Rêber Abdullah Ocalan û temamkirina hewldanên xelkê Minbicê ye ku 711 hezar û 180 îmze di pêngava komkirina îmzeyan de kom kirine.

Dûre cîgirê Meclisa Rêveber Cuma Heyder, hevserokên Desteya Çandê Rûla Osman û Mihemed Qîrtawî, endamê însiyatîfa ji bo azadiya Rêber Abdullah Ocalan Mihemed Husam El Şewax û hevserokê Yekitiya Rewşenbîran Ehmed El Yusif pirtûk li beşdaran belav kir.

(şx)

ANHA