Panorama hefteyekê : Hilweşîna Esed û bandora li ser Rojhilata Navîn

 Rojnameyên erebî yên hefteya borî behsa kontrolkirina Heyet Tehrîr El Şam li ser gelek bajarên Sûriyeyê, ragihandina hikumeta demkî kir.

PIŞTÎ HILWEŞANDINA ESED LI CÎHANÊ ŞOK

Rojnameya El Ereb behsa hilweşîna rejîma Beşar Esed kir û diyar kir ku cîhanê geşedanên şerê li herêmên dişopandin bê ka Îran dê çawa bersiva êrişên Îsraîlê bide û Îsraîl dê çawa bersivê bide. Heta sîstemên herî girîng ên îstixbaratî yên li herêmê jî anku yên Îranê û Îsraîlê, bi vê mijarê ve mijûl bûn. Lê plana Tirkiyeyê ku di derbeyekê de rejîma Sûriyeyê hilweşîne, her li paş perdeyê mabû.

‘SÛRIYEYA PIŞTÎ ESED Û PIRSGIRÊKA ARAMIYA HERÊMÎ LI ROJHILATA NAVÎN’

Rojnameya El Ereb a Londonê, bal kişand ser lihevkirina di navbera rejîma berê û hêzên opozîsyona Sûriyê de ku xuya ye li gorî hin lihevhatinên herêmî û garantiyên navneteweyî pêk hatiye. Li gorî analîzkirina hin agahiyên kêm, 3 mercên vê lihevhatinê hebûn.

Yek; derketina biewle ya Beşar Esed û malbata wî ku ew jî pêk hat, bi çûna wî ya Moskovê ku mafê penaberiyê wergirt.

Du; belavkirin û jinavbirina yekîneyên Artêşa Erebî ya Sûriyeyê û pergalên leşkerî û ewlekarî yên girêdayî wê, da ku rê bidin çekdarên opozîsyona Sûriyeyê ku rewşa leşkerî û ewlehiyê li Sûriyê kontrol bikin.

Sê; hikumeta Sûriyeyê dê berdewam be, li ser pêkanîna erkên xwe yên karîgerî valahiyeke siyasî çênebe ku dibe sedema teliheviyê ku hemû aliyên hundir û derve vê tiştê naxwazin û naxwazin Sûriye bikeve şerekî navxweyî yê nû.

Rojnameyê her wiha diyar kir: “Dîmena Sûriyeyê ya piştî Esed aloz e û rewşa siyasî û leşkerî, gelek valahiyên wê hene. Pêvajoya guherînê bi serkêşiya Ebû Mihemed El Colanî pêk tê ku kesekî xwedî dîrokeke grêdayî terorê ye. Opozîsyona Sûriyeyê jî îro di nava nezelaliya îdeolojîk de ye. Her wiha ev lihevhatinên sist ên heyî û nakokiyên ramyarî û siyasî di navbera aliyên cihêreng de û nebûna biryareke lihevhatineke zelal a herêmî û navneteweyî ji bo avakirina hikumeteke yekgirtî, ev tişt hemû tirsê çêdikin ku şerekî navxweyî çêbe û tenê gelê Sûriyeyê berdêla wê bide.”