NYˊê bang li Îsraîlê kir: Berfirehkirina wargehên li Şerîaya Rojava rawestîne

Rapora ku ji hêla Komîserê Bilind ê Mafên Mirovan ê Neteweyên Yekbûyî ve hatî weşandin destnîşan kir ku koçberiyên ku di navbera Mijdara 2024 û Cotmeha 2025’an de qewimîn “tehliyekirina bi zorê ya girseyî" pêk tînin.

Di raporê de wiha hat gotin, “Li Şerîaya Rojava zêdetirî 36  hezar Filistînî gihîştiye asteke bê mînak ku sirgûnên girseyî pêk tîne." Di raporê de hişyarî da ku ev rewş xetereya paqijkirina etnîkî diafirîne.

Rapora diyar kir ku dema ku geşedanên li Şerîaya Rojava, bi koçberiya girseyî ya li Xezeyê tê nirxandin, ev yek nîşan dide ku Filistînî bi awayekî sîstematîk ji cih û warên xwe tên dûrxistin.

Li gorî daneyên NY’ê rayedarên Îsraîlê di vê serdemê de ji bo li Rojhilatê Qudsê nêzîkî 37 hezar û li deverên mayî yên Şerîaya Rojava jî zêdetirî 27 hezar xaniyên nû bên çêkirin erê kiriye. Rayedaran diyar kirin ku armanca vê polîtîkayê ew e ku bêtir axa Filistînê desteser bikin.

Rêveberê Ofîsa Filistînê yê NY’ê Ajith Sunghay diyar kir ku Filistînî her roj ji mal û erdên xwe têne derxistin, ev yek rê li ber berfirehkirina wargehên neqanûnî vedike.