Li Silêmaniyê bi hezaran qîr kir: Bijî Berxwedana Rojava

Bi hezaran welatiyên Silêmaniyê ji bo piştevaniya berxwedana Rojavayê Kurdistanê li qadan in. Xelkê Silêmaniyê bi dirûşmeyan êrişên li ser Rojava şermezar kirin.

KURDISTAN

22 ÇILE, 2026 20:38

NAVENDA NÛÇEYAN

Çalakiyên xelkê Silêmaniyê ji bo piştgirî û piştevaniya bi berxwedana Rojavayê Kurdistanê û şermezarkirina êrişên li ser Rojava, berdewam in.

Di heman çarçoveyê de li ber Baxê Giştî yê li kolana Salim a bajarê Silêmaniyê, meşek girseyî bi dirûşmeya ‘Bijî Berxwedana Rojava’ û ‘Jin, Jiyan, Azadî’ hate lidarxistin. Bi hezaran kesan bi yek dengî piştevaniya xwe ji gelê Kurd ê Rojavayê Kurdistanê dubare kirin.

Xwepêşanderan daxwaz û banga rawestandina êriş û dagirkeriya li ser Rojavayê Kurdistanê kirin. Her wiha tekezî kirin ku hertim wê li gel xwişk û birayên xwe yên Rojava bin û bang li civaka navneteweyî kirin ku li beramberî êrişên li ser herêmên sivîl û saziyên xizmetgûzariyê bêdeng nemînin û helwest nîşan bidin.

Biryar e di çarçoveya berdewamiya çalakiyên piştevaniyê de, sibe roja îniyê saet 14:30’an de li ber Baxê Giştî xwepêşandanek mezin were lidarxistin.