Li Serêkaniyê xebata rakirina mayînan dest pê kir

Bi armanca rakirina mayînan û vekirina rê li pêşiya vegera koçberên Serêkaniyê li cih û warê xwe, komîteyeke pispor hatiye avakirin.

Der barê mijarê de endamê Koma Serokomariyê ya şopandina peymana 29`ê Çileyê Mustefa Ebdî ji ajansa me re axivî.

Ebdî anî ziman ku ji bo rakirina mayînan û vekirina rê li pêşiya vegera koçberan, komîteya pispor hatiye avakirin ku ji Hêzên Ewlekariya Hundirîn ên bajarê Serêkaniyê û Firqeya 60‘î artêşê pêk tê.

Ebdî destnîşan kir ku nexşeyên cihên mayînan jî di nav de tevahî amadekariyên lojîstîkî amade ne da ku tîmên pispor dest bi rakirina mayîn û xetereyan bikin.

Mustefa Ebdî her wiha diyar kir ku rêya Til Temir-Serêkaniyê, her wiha rêya Dirbêsiyê-Serêkaniyê di demên dawîn de hatin vekirin, lê ber belavbûna mayînan tevgera çûn û hatinê li ser van rêyan tune ne. Her wiha îşaret pê kir ku rakirina mayînan dê rê li ber tevgera şênî û koçberan bike.

Li gorî Komîteya Koçberên Serêkaniyê, zêdetirî 80 hezar koçber li bende ne ku li gorî peymana 29‘ê Çileyê, bi awayekî ewle vegerin cih û warên xwe.

(bb)