Li Qamişloyê şehîdên ragihandina azad hatin bibîranîn

Yekitiya Ragihandina Azad (YRA) ji bo 6ˊemîn salvegera şehadeta nûçegihana ajansa me Saad El Ehmed, nûçegihanê Çira TV Mihemed Reşo, wênekêş û derhênerê sînemayê Wîdad Ardimcî (Welat) û xebatkara çapemeniyê ya Yekîneyên Parastina Jinê (YPJ) Dîlan Olmaz merasîma bibîranînê li Pakrewangeha Şehîd Delîl Saroxan a Qamişloyê li dar xistin. Şehîd Saad Ehmed, Mihemed Reşo û Dîlan Olmaz di 13ˊyê Cotmeha 2019ˊan de û Wîdad Ardimcî di 10ˊê Cotmeha 2019ˊan de li Serêkaniyê şehîd bûbûn. Di merasîmê de endamên Meclisa Malbatên Şehîdan û hevrêyên şehîdan amade bûn.

Di merasîma bibîranînê de li ser navê Yekitiya Ragihandina Azad (YRA) şêwirmend Bunyad Cizîrê axivî û got: "Di şexsê Mihemed Reşo de em hemû şehîdan bi bîr tînin. Bê guman şehîd Mihemed da pey şopa şehîdên me yên çapemeniya azad û xwest rastiya planên qirêj ji cîhanê re aşkera bike. Şehîdan xwestin bi kamereya xwe rastiya êrişan û dijmin ragihîne û di vê rêyê de gihîştin asta şehadetê."

Piştre bavê şehîd Mihemed Reşo, Hisên Reşo axivî û got: "Em îro 6' emîn salvegera şehîdên xwe bi bîr tînin û êşa xwe bi we re parve dikin, em ê li ser rêya şehîdên xwe bimeşin."

Dûre hevalê şehîd rojnemevana Çira TV Zinar Cefer got: "Mirov çiqas behsa şehîdan bike nikare mafê wan bide. Em wek rêhevalên şehîdan, me soz daye armancên wan pêk bînin û şopdarê rêya wan bin.".

(fk/fr)

ANHA