Li Pêşangeha Şehîd Herekol beşdariya xwendekaran

Roja duyemîn a Pêşangeha Pirtûkan a Şehîd Herekol bi serdana xwendekarên zanîngeh û dibistanan dewam dike. Di pêşangehê de pirtûkên çîrokên zarokan û romanên têkildarî Şoreşa 19`ê Tîrmehê diyarî xwendekaran hatin kirin.

ÇAND Û HUNER

16 cotmeh, 2024 13:35

QAMIŞLO

Pêşangeha Pirtûkan a Şehîd Herekol a 8`an di roja xwe ya duyemîn de li Hola Zana ya bajarê Qamişlo dewam dike.

Pêşengeh duh (15 Cotmeh) bi beşdariya 54 weşanxane û saziyan dest pê kiribû.

Bi dehan rewşenbîr, nivîskar, lêkolîner, mamoste û xwendekarên zanîngeh û dibistanan, endamên saziyên Rêveberiya Xweser serdana pêşangehê dikin.

PIRTÛK KIRIN DIYARÎ

Mamosteyên dibistanan bi armanca teşwîqkirina xwendina pirtûkan xwendekarên xwe anîn pêşangehê û beriya ku li pêşagehê bigerin sirûda `Ey Reqîb` gotin. Weşanxaneya Şilêr bi dehan pirtûkên çîrokên zarokan û romanên li ser Şoreşa 19`ê Tîrmehê yên bi kurdî diyarî xwendekaran kirin.

Îro danê êvarê bi sernavê `Wêje û rexnegiriya wêjeyî li Rojavayê Kurdistanê` ji aliyê nivîskar Merwan Berekat ve dê semîner were dayîn û merasîma îmzekirina pirtûkan û şahiyeke hunerî bê lidarxistin.

Pêşangeh heta 22`yê Cotmehê dê dewam dike.

(sb)

ANHA