Li Parlamenta Ewropayê dê konferansa li ser pirsgirêka Kurd û pêvajoya aştiyê bê lidarxistin

Konferansa 20'emîn a bi navê "Yekîtiya Ewropa, Tirkiye, Rojhilata Navîn û Kurd" ku ji aliyê Komîsyona Welatiyan a Yekîtiya Ewropa-Tirkiye (EUTCC) ve tê birêxistinkirin, îsal di 14-15'ê Cotmeha 2026'an de li Parlamenta Ewropayê ya li paytexta Belçîka Brukselê tê lidarxistin. 

Konferans ku Komam Çep (The Left), Kesk/Tifaqa Azad a Ewropayê (Greens(EFA) û Tifaqa Pêşverû ya Demokrat û Sosyalîstan (S&D) ên li Parlamenta Ewropayê di nav de ne, li gel bûyerên siyasî yên li Ewropa û Rojhilata Navîn wê çareseriya demokratîk a pirsgirêka Kurd û Pêvajoya Aştî û Civaka Demokratîk a li Tirkiyeyê bixe rojevê.

Konferans wê bi pêşengiya Xelatgira Aştiyê ya Nobelê parêzvana mafên mirovan a Îranî Şîrîn Ebadî, aktîvîst Bianca Jagger û Xelatgira Azadiya Fikrî ya Saharovê ya Parlamenta Ewropayê siyasetmedara Kurd Leyla Zana bê lidarxistin.

Di konferansa ji 2 rojan de endamên Parlamenta Ewropayê, siyasetmedar, akademîsyen, hiqûqnas, rojnamevan û parêzvanên mafên mirovan wê bigihêjin hev.

Konferans wê 14'ê Cotmehê roja Çarşemê saet di 17:00 de li avahiya Spinelli ya Parlamenta Ewropayê bi resepsiyon û axaftinên destpêkê, destpê bike.

Destpêkê wê endama Desteya Rêveber a EUTCC Dersim Dagdevîren, Xelatgira Aştiyê ya Nobelê Şîrîn Ebadî, siyasetmedara Kurd Leyla Zana, Hevserokê Koma Çep a Parlamenta Ewropayê Martin Schirdewan û endamê Koma S&D Andreas Schieder biaxivin.

Roja duyemîn a konferansê wê 15'ê Cotmehê Pêncşemê saet di 09:30'î de destpê bike.

Destpêkê wê Seroka EUTCC û ji Zanîngeha Bergenê Kariane Westrheim, Dersim Dagdevîren, Şîrîn Ebadî û Leyla Zana, her wiha endamên Parlamenta Ewropayê Leila Chaibi, Leoluca Orlando û Evîn Încîr, Navbeynkarê Neteweyên Yekbûyî Mark Muller biaxivin.

Di rûniştinê de her wiha ji Zanîngeha Wageningenê Prof. Dr. Joost Jongerden wê rabirdûya 20 salan a konferansên EUTCC û bûyerên li Ewropa û Rojhilata Navîn binirxîne.

Di roja duyemîn a konferansê de saet di 10:15'an de wê rûniştina bi sernavê "Rojhilata Navîn a li ser xala werçerxê: Guherînên Jeopolîtîk, Veguherîna Demokratîk û Lêgerîna Aştiyê" pêk were.

Di rûniştinê de ya bi moderatoriya rojnamevan Dîlek Odabaşi, akademîsyen Dogû Ergîl, rojnamevan Amed Dîcle û ji Zanîngeha Baltimoreyê Colin Starger wê biaxivin.

Yek ji rûniştinên sereke yên konferansê jî wê saet di 11:00 de bi sernavê "Di navbera Pêvajoya Aştiyê û Krîza Demokratîkbûnê de Tiriye: Diyalog, Serweriya Hiqûqê û Paşeroja Tevlîbûna Siyasî" bê lidarxistin.

Endama Heyeta Îmraliyê ya DEM Partiyê û Parlamenter Pervîn Bûldan, Parlamenterê Partiya DEVA Mehmet Emîn Ekmen, Parlamenterê Yenî Partiyê Okan Konûralp û Parlamenterê CHP'ê Ogûz Kaan Salici wê biaxivin.

Di panelê de wê paşeroja pêvajoya aştiyê ya li Tirkiyeyê, demokratîkbûn, serweriya hiqûqê, tevlîbûna siyasî û derfetên diyalogê werin nîqaşkirin.

Di beşa piştî nîvro ya konferansê de wê nêzîkatiya Yekîtiya Ewropayê ya li pirsgirêka Kurd û têkiliyên bi Tirkiyeyê re bê nirxandin.

Rûniştina bi navê "Yekîtiya Ewropa û Tirkiye: Zehmetî û Alternatîf" wê saet di 15:00 de bi moderatoriya parlamenterê berê yê HDP'ê Hişyar Ozsoy bê lidarxistin.

Raportorê Tirkiyeyê yê Parlamenta Ewropayê Nacho Sanchez Amor wê di rûniştinê de biaxive.

Saet di 15:30'î de wê bi sernavê "Yekîtiya Ewropa, Tirkiye û Kurd: Di navbera Hevkariya Stratejîk û Bendewariyên Demokratîk de" panelek pêk were.

Di panelê de wê endamên Parlamenta Ewropayê Li Andersson, Pernando Barrena, Vladimir Prebilic û Thijs Reuten biaxivin.

Her wiha ji Enstîtuya Mafên Mirovan a Yekîtiya Baroyan a Navneteweyî Eleonora Scala û ji Buroya Hiqûqê ya Sedsalê parêzer Raziye Ozturk jî wê beşdarî panelê bibin.

Di panelê de wê têkiliyên Yekîtiya Ewropayê yên bi Tirkiyeyê re, pirsgirêka Kurd, bendewariyên demokratîk û mafên mirovan werin nirxandin.

Panela dawî ya konferansê jî wê saet di 16:30'î de bi sernavê "Jinên ku paşerojê diyar dikin: Guherîna Demokratîk, Yekîtiya Kurdan û Aştiya li Rojhilata Navîn" pêk were.

Panel wê bi moderatoriya zanyara siyasetê Arzû Yilmaz were lidarxistin û ji Zanîngeha Bielefeldê Atefeh Ramsari, ji Tevgera Jinê ya Azad parlamentera berê ya HDP'ê Sebahat Tûncel û nûnera Rojava Îlham Ehmed wê biaxivin.

 Konferans wê 15'ê Cotmehê roja Pêncşemê saet di 18:00 de bi rûniştina dawiyê bi dawî bibe.

 Di rûniştina dawî de ku ji aliyê Desteya Rêveber a EUTCC ve bê lidarxistin wê nîqaşên du rojan bêne nirxandin, encam û pêşniyar bêne eşkerekirin û encamnameya konferansê bê pêşkêşkirin.

 Di konferansê de ku wê li salona 1G2 a li avahiya Spinelli ya Parlmaenta Ewropayê were lidarxistin bi Kurdî, Tirkî, Îngilîzî, Elmanî, Fransî, Farsî, Danî, Hollandî, Fînî, Yewnanî, Îtalî û Swêdî; bi 12 zimanan werger bê kirin.

 Ji bo beşdariya li konferansê divê berê qeyd bê kirin. Beşdarên qeydkirî wê karibin qertên xwe yên ketinê li deriyê bingehîn ê avahiya Altiero Spinelli ya li aliyê Place du Luxembourg a li Parlamenta Ewropayê werbigire.

Ji bo agahiyên berfireh ên têkildarî konferansê li ser navnîşana [email protected] dikare têkilî bi sekreteriya amadekar re bê danîn.