Li Minbicê semînerek li ser 8ˊê Adarê hat dayîn

Kombûna Jinan a Zenûbiya ya kantona Minbicê di çarçoveya çalakiyên 8'ê Adarê de ku duh bi dirûşma "Bi vîna jina azad em ê siyasetên qirkirin, dagirkerî û tecrîdê têk bibin" dest pê kirin, semînerek da. Di semînerê de roja 8'ê Adarê û sedema hilbijartina wê wek Roja Jinan a Cîhanê hatin şîrovekirin. Semîner li pirtûkxaneya Mihemed Menla Xizêl a Minbicê bi beşdariya endamên desteyên aborî, çandinî û perwerdeyê hat organîzekirin.

Di semînerê de hevseroka Kombûna Perwerdeyê ya Desteya Perwerdeyê ya kantona Minbicê Nehle Ebas destnîşan kir ku di 1857'an de bi hezaran jin daketin qada New Yorkˊê û doza mafên xwe û pêkanîna wekheviyê bi zilaman re kir.

Nehle diyar kir ku sûcên qirkirina komî yên ku li dijî jin û zarokan tên pêkanîn tenê bi rêya şoreşên jinan tên têkbirin, bo nimûne jî şoreşa jinan a Rojavayê Kurdistanê, Bakur û Rojhilatê Sûriyeyê ye.

Nehle wiha domand: "Jinên herêmê hêja ne ku şoreş bi wan werê binavkirin û tê de rêveberî û seroketiyê bikin."

Nehle destnîşan kir ku her tim jin piştgiriyê didin hev da ku serhildana jinan a li gorî fikrên Rêber Abdullah Ocalan bidome.

Her wiha, endama Komîteya Têkiliyan a Meclisa Jinan a Sûriyeyî ya kantona Minbicê Neqşiye Xelîl bal kişand ser pergala kapîtalîst û bikaranîna jinan ji bo pêkanîna berjewendiyên xwe û got: "Bi fikrên Rêber Abdullah Ocalan jinan rastiya xwe ya dîrokî nas kir û bi têkoşîna xwe sembolek ji bo jina azad afirand."

(mh)

ANHA