Li Lubnanê panela têkoşîna dijî tundiya li ser jinan

Di çarçoveya çalakiyên Roja Têkoşîna dijî Tundiya li ser Jinan a ku dikeve 25ˊê Mijdarê de, Kongra Star û Komeleya Newroz a Çand û Civakî ya Lubnanê bi navê "Rastiya tundiya li dijî jinan, astengî û asoyên guhertinê" li navenda komeleyê ya li Beyrûtê panelek organîze kir.

Di panelê de seroka Komîteya Têkiliyên Jinan a Komeleyê Henan Osman bi xêrhatina beşdaran kir û berfirehiya diyarkirina roja 25ˊê Mijdarê weke Roja Têkoşîna dijî Tundiya li ser Jinan şîrove kir.

Henan behsa şêweyên tundiya civakî ku hîna bi awayekî berdewam pêk tên kir û got "Diyardeya tundiyê bi awayekî neyênî bandorê li civakê û malbatê dike, li kêlek wê bandorê li perwerdekirina zarokan dike û bi wê re adatên nebaş ava dike."

Henan bal kişand ser rola neyênî ya medyayên civakî di belavkirina rêbazên tundiyê û pêşxistina bandora wê li ser beşa ciwanan.

Endama Kongra Star a Lubnanê Leyla Mihemd jî da zanîn ku "Jina Kurd di dirêjahiya serdeman de rûbirûyî gelek şêweyên tundiyê hat, lê bi saya fikir û felsefeya Rêber Abdullah Ocalan ku vîzyona jinan guher û girîngî da rola wê ya pêşeng di civakê de jinan xwe îsbat kir û li hember zihniyeta baviksalariyê sekinî".

Leylayê di dawiyê de got, "Ruxmî astengiyên ku jina Kurd tê re derbas bûye, lê bi seay beşdariya wê di têkbirina terorê û sekna li dijî xetertirîn rêxistinên terorîst êdî bûye pêşenga tevahî jinên cîhanê û zehmbola jina azad."

Panel bi diruşma "Jin, Jiyan, Azadî" bi dawî bû.

(ac/fr)

ANHA