Li Çilaxayê pêşbirka hespan

Komeleya Hespên Erebî yên Esîl a Kantona Cizîrê bi hevkariya Desteya Ciwan û Werzîşê ya kantonê pêşbirekeke hespan li dar xist. Pêşbirk bi beşdariya 88 siwarên ji Herêma Bakur û Rojhilatê Sûriyeyê li bajarê Çilaxa hat lidarxistin. Şêniyên kantona Cizîrê, şêx û rûspiyên eşîran, endamên saziyên Rêveberiya Xweser ji bo temaşekirina pêşbirkê amade bûn.

Beriya ku pêşbirk dest pê bike hevserokê Meclisa Rêveber a Kantona Cizîrê Telet Yûnis axivî. Yûnis diyar kir pêşbirkên wiha dewlemendiya çanda pêkhateyên kantonê nîşan dide û got Rêveberiya Xweser her tim hewl dide pêşbirkên wiha li dar bixe.

Hevserokê TEV-DEM’ê Ebduselam Seyîd Mehmûd spasiya saziyên organîzatorên pêşbirkê û got: "Ev çalakî ji bo parastina nasnameya hespên esîl ku beşeke çanda pêkhateyên kantonê yr, derfetek e.”

Piştî axaftinan 88 siwar ketin pêşbirkê.

Di qonaxa yekemîn a hezar û 600 metre de Ebduselam Elî bi hespê xwe Mehrûs Şiwê bû yekemîn, Mihemed Rehîl bi hespê xwe Helda Herbî bû duyemîn û Samir Iwêne bi hespê Muhîb El Omer bû sêyemîn.

Di qonaxa hezar û 100 metreyî de Hatim El Raxib bi hespê xwe Hemam El Setem bû yekemîn, Hemûd Menho bi hespê xwe Muhîb bû duyemîn û Elî Xelef bi hespê xwe Hemam El Îsa bû sêyemîn.

Di dawiya pêşbirkê de siwarên serkeftî hatin xelatkirin.

(bb)