Kongra Star civînên xwe li Helebê berdewam dike

Kongra Star di çarçoveya rewşa Sûriye û herêmê de, rêzecivînên ji bo jinan li taxên Şêxmeqsûd û Eşrefiyê yên Helebê didomîne.

Armanc ji van civînan hişyarkirina jinan li ser metirsiyên di vê qonaxê de û xurtkirina rola jinan di têkoşîna li hemberî zext û paşguhkirinê ye ku bikarin mafên xwe di civakê de misoger bikin.

Civîn beriya 2 rojan li malên jinan ên li rojhilatê taxa Şêxmeqsûd hatin lidarxistin.

Armanca wan ew e ku bigihîjin hemû jinên herêmê û piştre ew civîn ber bi rojavayê Şêxmeqaûd û taxa Eşrefiyê ve berfireh bibin.

Ji bo bidawîhatina civînan hîna demek dawîn nehatiye diyarkirin.

Di civînê de der barê geşedanên siyasî yên li Sûriyeyê diqewimin û ser rewşa jinan hemwextî guhartinên piştî hilweşîna rejîma Baas de, nîqaş û analîz hatin kirin.

Di nîqaşê de naveroka banga Rêber Abdullah Ocalan a 27ê Sibatê ya bi sernavê "Aştî û Civaka Demokratîk" hate nîqaşkirin.

Her wiha behsa rewşa jinan li herêmên peravê û Siwêdayê, binpêkirinên wek kuştin, revandin û sînordarkirina azadiyan bi bihaneyên olî û civakî, hate kirin. Ev yek nîşan dide ku tevî guhartinên di desthilatdariyê de lê hîna hişmendiya baviksalar berdewam e.

Beşdaran teqez kir ku hişyarî, zanabûn û tevlîbûna li têkoşînê nûnertiya rastîn a jinan di navendên girtina biryaran de misoger dikin û  wekheviyê û civaka demokratîk dide rûniştandin.

(ac)

ANHA