Tîma Şemal bû şampyonê turnuvaya futbolê

Bi sedan alîgir û endamên saziyên sivîl û leşkerî û nûnerên Rêveberiya Xweser ji bo temaşekirina maça dawîn a di navbera tîma Şemal û tîma Serdem de, berê xwe da yarîgeha Beledî ya li Reqayê.

Hevseroka Desteya Ciwanan û Werzîşê ya Bakur û Rojhilatê Sûriyeyê Henan Bekar turnûva wekî serkeftinekê nirxand û got: "Em dikarin bibêjin ku êdî werzîş bi saya keda kesên di qada werzîşê de dixebitin, li Bakur û Rojhilatê Sûriyeyê bi pêş dikeve. Ev turnûva jî ji bo gelên me yên herêmê serkeftineke mezin e. "

Cîgirê hevseroketiya Meclisa Rêveber a Bakur û Rojhilatê Sûriyeyê Gabrîêl Şemûn şehîdên azadiyê bi bîr anîn û ji birîndaran re şîfa xwest. Şemûn anî ziman ku bi saya şehîd û birîndarên şer, îro li yarîgehê kom bûne.

Rûspiyê qebîleya Tay Hisên El Ferhan got: "Werzîşvan û ciwanên rêzdar; bi navê Desteya Rûspiyan a Bakur û Rojhilatê Sûriyeyê em ji cîhanê re dibêjin, gelê me yek e û ji bo têkbirina komployên ji derve û yên hundirîn gelek şehîd dane.′′

Piştre lîstikvan derbasî yarîgehê bûn û maç bi coşeke mezin ji aliyê temaşevanan ve bi rê ve çû.

Bi encama 1-0 tîma Şamal bi ser ket û bû şampyon û kupaya turnuvayê wergirt, her wiha lîstikvanên herdu tîman hatin xelatkirin.

Turnûvaya futbolê ya mêran 6′ê Cotmehê ji aliyê Yekitiya Werzîşê ya Bakur û Rojhilatê Sûriyeyê ve hatibû destpêkirin. 10 tîmên Bakur û Rojhilatê Sûriyeyê beşdar bûn.

(mh)

ANHA