Karên destan ên mamosteyên jin hatin pêşandan

Rêveberiya Pêşdibistnan a bajarê Hesekê pêşangeha karên destan ên mamosteyên jin vekir, 110 mamoste tevlê bûn.

ROJANE

6 îlon, 2025 14:13

HESEKÊ

Nivîsgeha Jinan a Rêveberiya Dibistanan a bajarê Hesekê yê kantona Cizîrê, di 24`ê Tebaxê de, ji bo mamosteyên jin ên pêşdibistanan korsa fêrkirina karên destan û çêkirina alavên perwerdekirina zarokan, vekir.

Kors bi tevlêbûna 110 mamosteyan 10 rojan dewam kir. Di korsê de mamosteyên jin der barê karên destan, çêkirina alavên perwerdekirina zarokan û awayên mijûlbûna bi zarokên pêşdibistanan re, hatin perwerdekirin.

Piştî bidawîbûna korsê, îro li pêşdibistana Hêvî ya zarokan a li bajarê Hesekê pêşangeha karên destan yên mamosteyên jin hat vekirin.

Nûnerên Desteya Perwerdeyê li Kantona Cizîrê, mamoteyên jin ên pêşdibistanên bajarên Hesekê, Dirbêsiyê, Til Temir, Şedanê û Holê beşdar bûn.

Endama Komîteya Jinan a Desteya Perwerdeyê li kantona Cizîrê Nisrîn Umer axivî û da zanîn ku ji mamosteyên jin tê xwestin ku zarokan bi awa û alavên rast perwerde bikin da ku karibin nifşekî azad û demokrat ava bikin.

Di pêşangehê de karên destan û berhemên 110 mamosteyên jin hatin pêşandan.

Pêşangehê rojekê dewam dike.

(k)