Ji Qereçoxê heta Tişrînê berxwedana gel didome

Di sibeha 25’ê Nîsana 2017’an de li herêmên Bakur û Rojhilatê Sûriyeyê bûyereke ku şopeke kûr di bîra gel de hişt, pêk hat. Artêşa Tirk a dagirker bi 28 balafirên şer Çiyayê Qereçoxê yê kantona Cizîrê ku navenda Yekîneyên Parastina Gel (YPG) û Yekîneyên Parastina Jin (YPJ) bû bombebaran kir.

Di encama bombebaranê de 20 şervanên YPG`ê û YPJ`ê şehîd bûn. Piraniya wan fermandarên şerê li dijî çeteyên DAIŞ'ê li eniyên herî pêş ên Minbic û Reqayê bûn. Di nava wan de rojnamevanên leşkerî jî hebûn ku têkoşîna gelê herêmê ya li dijî çeteyên DAIŞ’ê belge dikir.

Êrişa li ser Qereçoxê yekemîn êrişa leşkerî ya rasterast a artêşa Tirk a dagirker a li dijî Bakur û Rojhilatê Sûriyeyê bû û bi armanca astengkirina têkoşîna li dijî çeteyên DAIŞ’ê bû.

Piştî êrişa li ser Çiyayê Qereçoxê ku sembola sekn û têkoşîna gelê herêmê ye, girseyeke mezin a gel, ji zarok, jin, mêr û kal û pîran, ber bi cihê êrişa li ser çiyayê Qereçoxê ve çû, bi lehengî li ber germê û zehmetiyan ketin rê. Ji bo şermezarkirina komkujiyê hilkişiyan çiyayê ku bi qasî 770 metre bilind e. Ji dewleta Tirk a dagirker re peyameke zelal bû ku hemû pêkhate di heman çeperê de ne.

Di wê şevê de balafirên şer ên artêşa Tirk a dagirker bi armanca bêdengkirina dengê civakê bombe li radyoya Dengê Rojava barandin.

MÎRATEYA BERXWEDANÊ

Komkujiya Qereçoxê, bûye sembola biryardarî û hêzê. Rêveberiya Xweseriya Demokratîk a Bakur û Rojhilatê Sûriyeyê ji bo bîranîna şehîdan roja 25’ê Nîsanê wek “Roja Şehîdan” ragihand. Ji wê demê ve gelên Bakur û Rojhilatê Sûriyeyê her sal di 25’ê Nîsanê de ji bo bîranîna şehîdan ber bi çiyayê Qereçoxê ve diçin û soza berdewamkirina rêya şehîdan didin.

Dema ku şênî ber bi çiyayê Qereçoxê ve diçin, hevgirtina xwe ya bi zarokên xwe yên di nava refên YPG`ê û YPJ`ê de nîşan didin. Ev berxwedana gel bû bingeha serkeftinên şoreşa Bakur û Rojhilatê Sûriyeyê û bû mînaka xwişk û biratiyê û pêkvejiyana pêkhateyan.

Dewleta Tirk bi vê komkujiyê xwest vîna gel bişikîne. Lê encam berovajî wê bû, vîna gel a berdewamkirina têkoşînê û şopandina rêya şehîdan mezintir bû.

JI QEREÇOXÊ HETA BENDAVA TIŞRÎNÊ

Ji destpêka êrişa li ser Çiyayê Qereçoxê û heta niha, ruhê welatparêziyê di nava gelên Bakur û Rojhilatê Sûriyeyê de xurttir bûye. Berxwedana li bendava Tişrînê ku zêdetirî 100 roj e dewam dike, nîşana vê têkoşîna berdewam e. Gel tevî astengiyan jî berxwedana xwe ya li bendavê didomîne.

Ji 8’ê Çileyê ve şêniyên Bakur û Rojhilatê Sûriyeyê ji bo parastina bendava Tişrînê ji êrişên artêşa Tirk a dagirker û çeteyên wê bi karwanan ber bi bendava Tişrînê ve diçin. Li gel ku rastî êrişên rasterast hatin û heta niha rojnameger, hunermend û rêveber jî di nav de, 25 kes şehîd bûn jî, lê herikîna karwanan berdewam dike.

(k)

ANHA