Ji bo bîranîna Mihemed Şêxo merasîmek hat lidarxistin

Mihemed Şêxo di 37`emîn salvegera koça xwe ya dawîn de Ii Qamişloyê bi merasîmekê hate bibîranîn.

ROJANE

9 adar, 2026 16:31

QAMIŞLO

Yekitiya Hunermendan a Cizîrê û Navenda Çand û Hunerê ya Mihemed Şêxo, bi boneya 37`emîn salvegera wefata hunermend Mihemed Şêxo, li Navenda Çand û Hunerê ya Mihemed Şêxo a li bajarê Qamişlo, merasîmek organîze kir.

Di merasîmê de hunermend, nivîskar, rewşenbîr, malbata Mihemed Şêxo û hezkiriyên wî ku piranî ciwan bûn, amade bûn.

Di merasîmê de birayê Mihemed Şêxo hunermend Beha Şêxo axivî û got: “Mihemed Şêxo digot `eger piştî koça min û ez bawer im ji vê gotina xwe, sed sal jî derbas bibin, dê milet li min guhdarî bike û stranên min şîrove bike`.”

Beha Şêxo destnîşan kir ku Mihemed Şêxo stranên şoreşgerî, evîndarî û civakî gotine û 3 nifş bi stranên wî mezin bûne.

Piştre ji hêla Koma Ciwanan a Mihemed Şêxo û Koma Botan ve stranên Mihemed Şêxo hatin gotin. Her wiha hunermend Sefqan Orkêş û Amir Remo jî di merasîmê de stran gotin.

Mihemed Şêxo sala 1948`an li gundê Xecokê yê Qamişloyê ji dayik bûye û di 9`ê Adara 1989`an de li Qamişloyê jiyana xwe ji dest da.

(sb)

ANHA