Ji ber êrişên dewleta Tirk a dagirker zirareke pir mezin gihaşt binesaziyê

Dewleta Tirk a dagirker di êrişên xwe yên li dijî herêmê de kargehên sereke yên jiyanê, stasyon û binesaziya Herêma Bakur û Rojhilatê Sûriyeyê kirin hedef. Bi taybetî stasyonên sereke yên petrol û gazê. Di encamê de binesazî hat wêrankirin û ew stasyon ji kar derketin.

ZEVIYA EL SEÎDE

Depoyên sereke yên zeviya petrolê ya El Seîde ya bajarê Tirbespiyê bi temamî şewitîn. Ji ber herikîna petrolê û pêketina agir stasyon bi tevahî şewitî.

Zeviya El Seîde 2 zeviya herî mezin a komkirina petrolê ya li kantona Cizîrê ye. Çend kîlometreyan dûrî sînorê Bakurê Kurdistanê û Herêma Bakur û Rojhilatê Sûriyeyê ye. Di sala 1975’an de bi 23 bîran dest bi xebatê kir.

Ji ber topbarana dijwar a li ser stasyonê, kel û pel û parçeyên depoyan pekiyan. Ev jî ji dîmenên ku nûçegihanên me kişandin, xuya dibe.

Piştî çend hefteyan kargehên hundirê zeviya El Seîde hatibûn sererastkirin ku di 2023’yan de jî ji aliyê dewleta Tirk a dagirker ve hatibû hedefgirtin.

Di êrişan de odeyên karmendên stasyonê jî hatin rûxandin.

STASYONA ODA

Stasyona Oda ya li rojhilatê Tirbespiyê yek ji kargehên herî mezin û stratejîk ên kantona Cizîrê ye. Ew çavkaniya sereke ya hilberandina kehrebeyê ji bo navend û saziyên xizmetguzariyê ye. Ew jî bi rêya turbînên gazê dixebite. Her wiha stasyon petrol, gaz û sotemeniyê jî hildiberîne.

Şeva çarşemê (23 Cotmeh) saet di 02:10’an de balafireke şer a dewleta Tirk a dagirker kargeh, embar, trumpeyên petrolê û ode bi 5 moşekan hedef girtin. Di encamê de 2 kortên mezin di kargehan de çêbûn.

Kel û pel û parçeyên ji kargehê heta 400 metreyan pekiyan, lê tu zirarên giyanî çênebûn.

Di êrişan de 4 fasilên depoyeke petrolê hatin hedefgirtin, di encamê de bi temamî hat wêrankirin. Karkerên stasyonê da zanîn ku ji bo diyarkirina rêjeya zirarê xebat didomin, lê teqez ne kêmtirî bi milyonan dolaran e.

Ev cara 4’emîn e ku stasyon tê hedefgirtin. 20’ê Mijdara 2022’yan, 4’ê Cotmeha 2023’yan û 23’yê Kanûna 2023’yan jî hatibû hedefgirtin.

STASYONA PETROLÊ YA GIRZÎRO

Di 26’ê Cotmehê de, saet di 13:30’an de, balafireke bêmirov a dewleta Tirk a dagirker stasyona Girzîro ya berhevkirina berhemên petrolê ya başûrê rojavayê bajarê Dêrikê bi 3 moşekan hedef girt.

Her wiha geraca wesayîtên stasyonê, embarek ku tê de kel û pel hebûn, hatin hedefgirtin.

Di encama êrişê de zirareke mezin çêbû, 3 sahrîcên veguhastina fiyûlê û 2 barhilgir hatin rûxandin.

STASYONA SIWÊDIYÊ YA SÊYEMÎN

Li stasyona Siwêdiyê ya sêyemîn a Dêrikê musfateke petrolê ya hilberandina mazot, benzîn û gazê heye û ew stasyon pêdiviyên Herêma Bakur û Rojhilatê Sûriyeyê ya mazot û gazê peyda dikir.

Nîvê şeva 23’yê Cotmehê êrişên herî dijwar ên li ser stasyonê hatin pêkanîn. Dema ku karkeran dest bi karê xwe dikir, staston hat hedefgirtin.

Di wê êrişê de 7 karker şehîd bûn û 17 jî birîndar bûn. Di stastyonê de nêzî 75 karkar dixebitîn.

Di êrişên xwe de dewleta Tirk a dagirker 7 moşekên giran bi kar anîn. Di encama teqîna wan de 4 kortên mezin li stasyonê çêbûn û stasyon hat wêrankirin û parçeyên kargehê heta 500 metreyan pekiyan.

Di encamê de hemû kargehên stasyonê, 6 parzûn, depoyeke mezin a petrolê, 2 depoyên mazotê û embarek hatin wêrankirin. Her wiha bi dehan wesayîtên veguhastina sotemeniyê, sahrîc û 8 mator hatin rûxandin.

Her wiha stasyonên kehrebeyê, hatin rawestandin. Niha stasyon bi temamî derveyî xizmetê ye. Karkarên wê ji ajansa me re diyar kir ku hîn ew nizanin çi qas zirar çêbûye.

KARGEHA ZOZAN A MAST Û PENÎR

Ajansa me bi wêne û dîmenan zirara ku gihaştiye kargeha Zozan a mast û penîr a bajarê Dêrikê jî belge kir. Di encamê de 3 karmendên jin birîndar bûbûn.

(mh/k)

ANHA