Hêzên Disîplîna Leşkerî li Kobanê dest bi operasyona desteserkirina çekan kir

Berdevkê Hêzên Disîplîna Leşkerî Mîran Kobanê da zanîn ku li Kobanê dest bi operasyona desteserkirina çekan kirine.

ROJANE

23 adar, 2026 14:46

KOBANÊ

SARYA ŞÊXO

Hêzên Disîplîna Leşkerî yên bajarê Kobanê li hember teqandina katober a çekan di nava bajêr de, dest bi operasyoneke desteserkirina çekan kir.

Der barê mijarê de berdevkê Hêzên Disîplîna Leşkerî yên Kobanê Mîran Kobanê ji ajansa me re got: "Me dest bi operasyona destesekirina çekan kir. Ji ber ku di van demên dawiyê de bê ser û ber gule di nava bajêr de tên avêtin. Ji ber vê yekê me dest bi operasyonê kir.”

Mîran Kobanê diyar kir: "Dema ku êrişeke mezin çêbe, wê demê sivîl dikarin çekan hilgirin û bi hêzên xwe re bibin alîkar da ku em parastina axa xwe bikin.”

Mîran Kobanê di dewama axaftina xwe de ev tişt anî ser ziman: “Xwesteka me ji gel ew e ku bi hêzên xwe re bibin alîkar da ku em bikarin pêşî li avêtina ketober a guleyan bigirin. Kesên ku ketober çekan biavêjin, wê demê li gorî zagonan dê tedbîr bêne girtin.”

Di dawiyê de Mîran Kobanê got: “Daxwaza me ji gelê me ew e ku gule bê ser û ber neyên avêtin da ku zirar negihêje gelê me. Operasyona me dê dewam bike, heta ku aramî û ewlehî di nava bajêr de pêk were.”

ANHA