"Her gavek ber bi şer ve dê bandorê li ser tevahiya Sûriyeyê bike"

Konfederasyona Rêxistinên Civaka Demokratîk êrişên hêzên hikûmeta veguhêz li ser taxên Şêx Meqsûd û Eşrefiyê yên Helebê şermezar kir, û diyar kir ku her gavek ber bi şer ve dê bandorên cidî li ser tevahiya Sûriyeyê bike.

23 kanûn, 2025 10:08

NAVENDA NÛÇEYAN

Konfederasyona Rêxistinên Civaka Demokratîk îro bi daxuyanyekê êrişên komên çekdar ên girêdayî Wezareta Parastinê ya hikûmeta veguhêz li ser taxên Şêx Meqsûd û Eşrefiyê li Helebê, şermezar kir.

Daxuyaniyê diyar kir ku ev êriş êrişek li dijî hewldanên kêmkirina aloziyê û avakirina aştiyê ne, û zirarê didin pêvajoya aştiyê.

Her wiha di daxuyaniyê hat gotin ku her gavek ber bi şer ve dê bandorên cidî li ser tevahiya Sûriyeyê bike, û tenê rêxistinên terorîst, di serî de DAIŞ, dê sûd jê werbigirin.

Konfederasyonê bang li hemû beşên civaka Sûriyeyê û hemû aliyên ku di karûbarên Sûriyeyê de beşdar in kir ku erkê xwe yê exlaqî û mirovî bicîh bînin da ku van êrişan rawestînin û dawî li wan bînin.

Daxuyaniyê hikûmeta veguhêz wek berpirsiyarê êrişan nîşan da, û daxwaz kir ku dawî li hebûna komên çekdar bîne, destdirêjiyan rawestîne, û bi ciddî peymana 10`ê Adarê pêk bîne.

(k)