‘Em ji destkeftiyên xwe venagerin’

Jinan diyar kir ku ew ê heta dawiyê piştgiriya YPJ`ê bikin û heta bidestxistina mafên xwe têkoşîna xwe di nava şoreşa Rojava de bidomînin. Her wiha gotin divê ji jinên li bajarên din ên Sûriyeyê bindestiyê qebûl nekin.

24 sibat, 2026 14:15

QAMIŞLO

SÎMA BIROKÊ

Beşdarên meşa piştgiriya Yekîneyên Parastina Jin (YPJ) û parastina destkeftiyên şoreşa Rojavayê Kurdistanê ya li Qamişloyê, nêrînên xwe bi ANHA`yê re parve kirin.

Sîham Remedan diyar kir ku ew wek dayikên Rojava û dayîkên şehîdan bi can û xwîna xwe bi YPJ`ê re ne û dê heta dawiyê piştgiriya YPJ`ê bikin û di nava şoreşa Rojava de jî têkoşîna xwe bidomînin.

Ayîşa Gedro jî got: “Em hatine ji bo em bêjin em bi YPJ`ê re ne, ji bo ku mafên xwe winda nekin û bila YPJ`ê ya me neçe. Em bi hêza jinên di nava şoreşê de bi hêz dibin.”

Botan Ebdulxefûr jî da zanîn ku ew ji bo parastina şoreşa xwe û ji bo ku mafên xwe weke jin di destûra Sûriyeyê de bi dest bixin, derketine qadê û wiha anî ziman: “Divê jinên li bajarên din ên Sûriyeyê bindestiyê qebûl nekin û em wek jinên Kurd qet bindestiyê qebûl nakin. Em ji pey destkeftiyên xwe venagerin.”

(bb)

ANHA