Di Festîvala Neteweya Demokratîk de beşdariya zarokekî

Li Festîvala Çanda Neteweya Demokratîk ku welatiyên ji pêkhateyên Kurd, Ereb, Suryan-Asûr û Ermen ên li Kantona Cizîrê bi alav û xwarinên ku kevneşopiya wan vedibêje, amade bûbûn, zarokê 13 salî jî yê bi navê Şêrwan Yûnis ê ji bajarê Amûdê berhmên xwe yên karê destan pêşan dabû. 

Şêrwan Yûnis, bi cil û bergên xwe yên folklora Kurdî beşdar bûbû. Ew refa 7`an e, ji dema ku di bexçeyê zarokan de bû wî ji resm û neqişê hez kiriye, ew behre pê re mezin bûye û gihaye asta ku tabloyên şêwekariyê çêdike.

Şêrwan Yûnis li ser cereyên (kûz)avê û parçeyên ji daran bi rengên cuda resimên kevneşopî û xwezayê çêkiribûn, sindoqên tep ên ku bi qumaşan hatibûn xemilandin dabûn pêşandan.

Şêrwan Yûnis dibêje ku wî ji beriya 10 rojan ve hazirtiyên xwe yên tevlêbûna festîvalê kiriye û ew bi kêfxweşî beşdar bûye.

Li gorî gotinên Şêrwan Yûnis, 25 tabloyên wî hene û niha ew hazirtiya vekirina dikaneke xwe ya hunerê li bajarê Amûdê dike.

Şêrwan Yûnis ev cara 4`an e tev li festîvalên hunerî yên ku li Kantona Cizîrê tên lidarxistin, dibe. Li 2`emîn Festîvala Çanda Neteweya Demokratîk jî ew bi tenê bi temenê xwe yê biçûk beşdar bûbû.

2`emîn Festîvala Çanda Neteweya Demokratîk duh li Girê Moza (Orkêş) a girêdayî bajarê Amûdê li ser asta Kantona Cizîrê hatibû lidarxistin, festîval tenê rojek bû.

(sb/fr)

ANHA