Di Cotmehê de 202 kes hatin kuştin

Di Cotmehê de li herêmên di bin kontrola hikumeta veguhêz a Sûriyeyê de û herêmên ji aliyê dewleta Tirk a dagirker û çeteyên wê ve hatine dagirkirin, 202 kes hatine kuştin.

ROJANE

1 mijdar, 2025 07:45

NAVENDA NÛÇEYAN

Li herêmên di bin kontrola hikumeta veguhêz a Sûriyeyê û herêmên di bin dagirkeriya dewleta Tirk û çeteyên wê de tevlihevî, sûcên kuştin û revandinê dewam dikin.

Di Cotmehê de li herêmên di bin kontrola hikumeta veguhêz a Sûriyeyê de û herêmên ji aliyê dewleta Tirk a dagirker û çeteyên wê ve hatine dagirkirin, 202 kes hatine kuştin. Di nava kuştiyan de 11 jin û 9 zarok hene. Hin kes di êrişên hêzên hikumeta veguhêz û çekdarên nenas de bi qetilkirina li meydanan hatine qetilkirin. Hin jî bi awayên biguman hatine kuştin. 6 zarok jî ji ber teqînan hatine kuştin, hin jin jî di malê de yan jî bi navê "takirina tolê" hatine qetilkirin.

Bûyerên kuştinan li Şam û gundewarên wê, Heleb, Dera, Hums, Idlib, Dêrazor, Siwêda, Laziqiyê rû dane.

Li Efrîn, Hema, Hums, Laziqiye, Siwêda û hin deverên din ên Sûriyeyê di Cotmehê de 17 kes hatine revandin. Aqûbeta hin revandiyan nayê zanîn.