Cihê çopê yê li Hesekê ji bo tenduristiya şêniyan dibe xetere

Li bajarê Hesekê cihê komkirina çopa bajar, nêzî taxa El Telaî û Kampa Serêkaniyê ye. Bi taybet di havînê de bêhna çopê gelekî tê û wexta dişewitînin dûmanê wê tê ser taxa El Telaî û Kampa Serêkaniyê.

Şêniyan diyar kir ku carne bi rojan agirê bi çopê ketiye venamirê û her tim dûman li ser serê wan e. Ji ber çopê hem şênî hem jî jîngeh ziyanê dibîne. Şênî ditirsin ku ji ber bêhna çopê û dûmana wê nexweş bikevin.

Elî Sincar ê ji taxa El Telaî got: "Ji ber çop nêzî me ye, bandorê li tenduristiya me dike. Bi şev û roj dûmanê çopê li ser serê me ye. Jixwe di havînê de pirsgirêk mezintir dibe. Hewa germ e û her tim çopê dişewitînin. Em ji aliyên têkildar dixwazin ku cihê çopê biguherînin û nema çopê bînin vir.”

Ebdulrehman Silêman ê li Kampa Serêkaniyê dimîne jî got: "Em bi şev ji ber bêhna çopê û dûmanê nikarin xew bikin. Di havînê de rojane bêhna çopê tê û dûman li ser serê me ye. Em ji ber çopê nikarin jiyana xwe rehet derbas bikin."

Şêniyên taxa El Telaî û Kampa Serêkaniyê ji Şaredariya Gel a Hesekê xwest cihê çopê biguherîni û bibin dûrî bajar.

Me gazinc û daxwaza şêniyan gihand Şaredariya Gel a Hesekê lê şaredariyê heta niha têkildarî mijarê tu daxuyanî nedane.

(np)

ANHA