Cenazeyê Armîta Girawend li Tehranê veşartin

Cenazeyê Armîta Girawend ku ji aliyê ‘Polîsên Exlaqê!’ yên Îranê ve hate qetilkirin li Tehranê hate veşartin.

29 cotmeh, 2023 16:22

NAVENDA NÛÇEYAN

1’ê Cotmehê jina ciwan a bi navê Armîta Girawend (16) a xelkê bajarê Kirmanşah ê Rojhilatê Kurdistanê li paytexta Îranê Tehranê qebûl nekir ku hîcabê bide serê xwe. Li ser vê yekê hêzên dewleta Îranê êrişî Armîta kir û di encamê de kete komayê.

Armîta duh (28`ê Cotmehê) piştî 28 rojan li Nexweşxaneya Fecir a li Tehranê jiyana xwe ji dest da.

Malbata Armîta xwest cenazeyê keça xwe li Kirmaşanê veşêre, lê ev yek ji aliyê rayedarên Îranê ve hat astengkirin û cenaze bi merasîmekê li Goristana Beheştî Zera ya Tehranê hat veşartin.

Hate hînbûn ku 8 kesên tevli merasîma veşartina cenaze bûn, piştî ku cenazeyê Armîta di bin dorpêçê de veşartin, hatine girtin.

Salek berê (Îlona 2022`yan) jî jina Kurd a ciwan Jîna Emînî li Tehranê rastî êrîşa “Polîsên Exlaqê!” hatibû û ketibû komayê. Jîna 16’ê Îlonê li nexweşxaneyê jiyana xwe ji dest da. Qetilkirina Emînî li welêt bû sedema serhildaneke mezin.