Bi çalakiyên çandî û perwerdehî 15’ê Gulanê hat pîrozkirin

LI REQAYÊ NAVENDA SZK’Ê HAT VEKIRIN

Desteya Perwerde û Fêrkirinê ya kantona Reqayê bi şahiyekÊ Saziya Zimanê Kurdî (SZK) vekir. Şahî bi dirûşma "Perwerdeya bi zimanê dayikê mafekê rewa û bingehîn e" û beşdariya kesayet û saziyên sivîl ên ji tevahî pêkhateyên Bakur û Rojhilatê Sûriyeyê hat organîzekirin.

Her wiha di şahiyê de nûnerên Desteya Jinan, Kombûna Jinan a Zenûbiya û desteyên sivîl beşdar bûn.

Mihemed Elî bi navê Desteya Perwerde û Fêrkirinê ya kantona Reqayê, Hêvîn Îsmaîl bi navê Meclisa Rêveber a Reqayê û hevseroka SZK'ê ya Bakur û Rojhilatê Sûriyeyê Viyan Hesen axaftin kirin.

Hêvîn Îsmaîl di peyama xwe de got zimanê Kurdî ji 2011'an ve tê vejandin û got: "Îro yekemîn saziya fermî ya SZK’ê, li kêlek zimanên din ên Erebî, Tirkmenî û Çeçenî, li Reqayê vedikin. Em vê saziyê diyarî her dayikek di oxira parastina nasname û zimanê de tê koşiyaye dikin."

LI HELEBÊ ŞEVBUHÊRK Û BIBÎRANÎNA CEGERXWÎN

Bi heman boneyê, Navenda Lêkolînan a Jineolojî li taxa Şêxmeqsûd a bajarê Helebê çalakiyeke li dar xist. Di çalakiyê de helbestvanê Kurd ê nemir Cegerxwîn ku wekî sembola parastina zimanê Kurdî tê naskirin, hat bibîranîn. Piştre stran û helbest hatin xwendin û sînevîzyonek li ser jiyana helbestvan Cegerxwîn hat pêşandan.

Endama Navenda Lêkolînan a Jineolojî Şêrîn Xelîl li ser qonaxên pêşketina zimanê Kurdî û zehmetiyên ku li pêşiya wî derketine, nexasim siyasetên qirkirina çandî û tunekirinê axivî.

LI QAMIŞLO ŞAHIYEKE GIRSEYÎ: BÊ ZIMANÊ JIYAN NABE

Desteya Hevbeş a Nivîskar û Rewşenbîrên Kurd li Rojavayê Kurdistanê şahiyeke mezin li parka Xwendinê ya bajarê Qamişlo li dar xist. Di şahiyê de bi dehan mamoste, rewşenbîr û şêniyên bajêr amade bûn. Ebdusemed Mehmûd û Berzo Mehmûd peyam xwendin. Di peyaman de girîngî bi girêdana bi zimanê Kurdî hat kirin.

SZK'ê ya bajarê Qamişlo jî çalakiyeke taybet li Pakrewangeha Şehîd Delîl Saroxan li dar xist. Di çalakiyê de hevseroka Desteya Perwerde û Fêrkirinê ya Herêma Bakur û Rojhilatê Sûriyeyê Semîra Hec Elî beşdar bû.

Semîra Hec Elî soza domandina têkoşînê li dijî rejîmên ku hewl dida nasnameya gelê Kurd tune bikin dubare kir û got zarokên gelê Kurd wê mafê xwe di destûra nû ya Sûriyeyê de wergirin.

Di dawiya çalakiyê de mûm li ser gorên şehîdan hatin pêxistin.

Di herdu çalakiyan de berhemên hunerî û helbest ji aliyê xwendekarên Zanîngeha Rojava û rewşenbîrên herêmê ve hatin pêşkêşkirin.

LI TIL TEMIRÊ 2 DEWREYÊN PERWERDÊ DER ÇÛN

Bi heman boneyê, Rêveberiya Dibistanan û Partiya Yekitiya Demokratîk (PYD) 2 perwerdeyên ku 60 mamoste û endamên saziyên civaka sivîl tev lê bûn, bi dawî kirin. Her dewreyeke perwerdeyê mehekê dom kir û tê de dersên li ser girîngiya zimanê Kurdî û hişyarkirina civakê hatin dayîn.

Hevseroka PYD'ê ya Til Temirê Ronaz El Yûnis di şahiya derçûnê de axivî û got: "Em di qonaxeke hestiyar re derbas dibin ku pêwistiya wê bi yekkirina kedan û pêşxistina asta zanabûna civakê heye."

Hevserokê Rêveberiya Dibistanan a bajêr Xidir El Elêwî got: "Sîstema perwerdehiyê mafê fêrbûna bi zimanê dayikê yê hemû pêkhateyan misoger kiriye."

Di dawiya çalakiyê de bawername li derçûyiyên herdu perwerdeyan hatin belavkirin û govend hatin gerandin.

(mh/fr)

ANHA 

REQA

TIL TEMIR

HELEB

QAMISLO