Bi boneya salvegera Serhildana Jin, Jiyan, Azadî çalakî li dar ketin

Li Bakur û Rojhilatê Sûriyeyê bi boneya salvegera 2’yemîn a Serhildana Jin, Jiyan, Azadî çalakî hatin lidarxistin.

QAMIŞLO

Li bajarê Qamişlo daxuyanî li pêşiya Navenda Çand û Hunerê ya Mihemed Şêxo hat dayîn. Di daxuyaniyê de jinan êlekên sor li xwe kirin, wêneyên Jîna Emînî û rojnamevan Gulîstan Tara û Hêro Behadîn ên ku di 23`yê Tebaxê de di encama bombebarana balafirên dewleta Tirk a dagirker de li Başûrê Kurdistanê şehîd bûbûn rakirin.

Daxuyanî ji hêla berdevka Kongra Star a Qamişloyê Ibtîsam Hisên ve hate xwendin.

Ibtîsam Elî bi bîr xist ku bi hezaran salan e bi destên sîstemên zayendperest, olperest û nîjadperest ve jin hatine kolekirin, pişaftin, tunekirin û qirkirin û li gorî berjewendiyên xwe bi kar tînin.

Ibtîsamê bi bomdarî got: "Di dîrokê de jin bê deng û bê reng di jiyanê de hatiye hiştin û paşguhkirin, bê rol û misyon di civakê de hatiye fetisandin, ji ber vê civak di dirêjiya dîrokê de bi yek alî, yek fikir û zihniyetê hatiye birêvebirin. Ev jî bûye sedema çînayetî, zordestî, xizanî, qirkirin, birçîbûn, şer û pevçûn li gel wê. Ji ber ku ev sîstemên kapîtalîst û desthilatdar baş dizanin wê bi azadiya jin, cewherê jin û zanista jinê derkeve wê desthilatdara wan têk biçe, bi hemû rê û rêbazan şerê jinê dikin û hewl didin ku koletiya xwe li ser berdewam bikin, ji ber ku bi koletiya jinê civak hemû kole û bin dest dibe.”

Îbtîsam Hesen di berdewama daxuyaniyê de got jin ji bo nirxên mirovahiyê tê dikoşin û ev yek anî ziman: “Ev demeke pir dirêj e jinên pêşeng li çiyayên azad ji bo azadiya xwe, hebûna xwe, nasnameya xwe , wekheviya zayendî, azadiya gelê Kurd û mirovahiyê li ber xwe didin. Her wiha Şoreşa Jinan a li Rojava ji aliyê dewleta Tirk a dijminê jinan ve tê hedefgirtin. Ne tenê li Rojavayê Kurdistanê,  li her çar parçeyên Kurdistanê û cîhanê û bi taybet jî serhildana ‘Jin, Jiyan, Azadî’ ku çirûska xwe ji Şoreşa Rojava girt, ji aliyê hêzên desthilatdar ve tê hedefgirtin. Rejîma Îranê bi sîstema xwe ya zayendperest  hewl dide ku bi ferzkirina lixwekirina desmalan mejiyê jinan tarî bike û bê rol bihêle. Lê belê li hemberî van kiryaran jinên rojhilatê Kurdistanê û Îranê rabûn ser piyan û serhildana ‘Jin, Jiyan, Azadî’ bi fikr û felsefeya Rêber Apo dane  destpêkirin û belavî hemû bajarên Îranê kirin.  Dirûşmeya ‘Jin, Jiyan, Azadî’ ne tenê li Îranê li belavî hemû cîhanî bû û ji hemû jinên cîhanê re bû ilhameke mezin. Nerîna Rêber Apo tekez kir ku sedsala 21’an wê bibe sedsala azadiya jinan.’’

Di berdewamq daxuyaniyê de hate diyarkirin ku bi dehan jinên serhildêr ji aliyê rejîma Îranê ve bi awayekî dermirovî hatine darvekirin û hate gotin: “Bi dehan jinên ku rabûn ser piyan û li hemberî sîstema Îranê serî hildan hatin girtin û cezayên darvekirinê li  wan hate birîn. Mîna Zeyneb Celaliyan, Pexşan Ezîzî, Şerîfe Mihemedî û bi dehan jinên din ên serhildêr.  Li Başûrê Kurdistanê  jinên rojnemevan Gulistan Tara, Hêro Bahadîn, Nagîhan Akarsel, li Parîsê Sakîne Cansiz, Evîn Goyî, li Rojavayê Kurdistanê Hevrîn, Zeyneb, Jiyan Tolhdilan, Rîhan Amûdê, Yusra Derwîş, Xalîda Mihemed, Sîwan Fatimê û bi sedan jinên leheng li hemberî vê zihniyetê li ber xwe dan kirin û şehîd bûn. Her wiha jinên Efxanistan û Hindistanê bi dirûşmeya ‘Jin, Jiyan, Azadî’ serî radikin û li ber xwe didin.”

Di dawiya daxuyaniyê de salvegera 2’yemîn a Serhildana Jin, Jiyan, Azadî hate silavkirin û bi van gotinan bi dawî bû: “Em wek Meclisa Kongra Star a bajarê Qamişloyê hemû şehîdên ku di vê oxirê de şehîd bûne, bi minetdarî bi bîr tînin û soz didin ku em ê têkoşîna wan berdewam bikin û xeyalên wan pêk bînin. Em bang li hemû jinên azadîxwaz, rêxistinên jinan û hemû jinên ku ji bo azadiya xwe têdikoşin dikin ku piştgiriyê bidin kampanya ‘Ji Darvekirinê re Na, ji Jiyana Azad re Erê’. Her wiha piştgiryê bidin kampanyaya ‘Ji Abdullah Ocalan re azadî, ji pirsgirêka Kurd re çareserî’  ku bes fikrên Rêber Apo dikarin bibin kilîta çareseriya hemû pirsgirêkan. Em ê asta têkoşîn û berxwedanê bilind bikin û Şoreşa Rojava bikin malê hemû jinên cîhanê.”

Meclis Jinan a Sûriyeyê jî daxuyaniyek li Qamişloyê da. Daxuyanî bi amadebûna endamên rêxistin û tevgerên jinan û partiyên siyasî ji aliyê rêvebera Nivîsgeha Têkiliyan a Meclisa Jinan a Sûriyeyê Gulistan Evdikê ve hat xwendin.

Gulîstanê Jîna Emînî bi bîr anî û got Jîna Emînî ji bo tevahî jinên Îran û Rojhilatê Kurdistanê bûye sembolê şoreşê. Ev dirûşme li Siwêdayê hat hildan. Li Bakur û Rojhilatê Sûriyeyê bûye hêmanê berxwedanê."

Gullstanê di dewama daxuyaniyê de got: "Dirûşma "Jin, Jiyan, Azadî" di kesyaeta Jîna Emînî de ji bo tevahî tevgerên jinan bûye manîfestoyek. Bûye dirûşmeyek ku qadan dexemilîne.

Gulîstan got, heya pergeleke dijî henan hebe wê çirûska şoreşê neyê vemirandin. Bang li tevahî rêxistinên jinan ên li Sûriyeyê û derve kirin ku li derdora serhildana jinan a ber bi konfederaliyê ve kom bibin.

KOBANÊ

Çalakiya li bajarê Kobanê bi amadebûna bi dehan jinên ji kantona Firatê li Qada Jina Azad bi deqeyeke rêzgirtinê dest pê kir.

Endama Rêveberiya Kongra Star li Kobanê Xunav Xelîl axivî û diyar kir ku Serhildana Jin, Jiyan, Azadî li cîhanê tevahî deng veda û wiha got: “Jinên Rojhilatê Kurdistanê li dijî zihnîyeta li Îranê heyî  serî hildan, bi hezaran jin hatin girtin û bi dehan hatin darvekirin. Em ê jî li dijî sîstema desthilatdar rêya bidestxistina azadiyê bişopînin.”

Piştre ji aliyê komên şanoyê yên girêdayî Tevgera Çand û Hunerê ya Baqî Xido ve şanoyek bi sernavê “Keziya Jin” hat pêşkêşkirin.

TEBQA

Bi heman armancê Meclisa Kombûna Jinan a Zenûbiya ya Kantona Tebqayê çalekiyek li Pakrewangeha Şehîdan li dar xist.

Nûnerên Rêveberiya Xweser, Partiya Sûriyeya Pêşerojê, Meclisa Leşkerî, Hêzên Ewlekariya Hundirîn-Jin, malbatên şehîdan û bi dehan jin beşdarî çalakiyê bûn.

Di çalakiyê de piştî pêxistina mûman li ber wêneyên şehîd Jîna Emînî sînevîzyonek li ser jiyana wê, îşkenceya ku li girtîgehê li wê hatiye kirin û Serhildana Jin, Jiyan, Azadî hat pêşandan.

Şêwirmenda Kombûna Jinan a Zenûbiya Roza Efrîn jî diyar kir ku jin ji bo azadiya xwe bi dest bixin divê xwedî îradeyeke azad bin û nehêlin civaka mêrserwer mafên wan biçewisîne.

Di dawiya çalakiyê de jinan dirûşmên silavkirina Serhildana Jin, Jiyan, Azadî berz kirin.

MINBIC

Meclisa Kombûna Jinan a Zenûbiya ya Kantona Minbicê jî bi boneya salvegera 2’yemîn a Serhildana Jin, Jiyan, Azadî semînerek da.

Semîner li hola Meclisa Gelan a Demokratîk a Kantona Minbicê ji aliyê endama Meclisa Leşkerî ya Jinan Selwa Ebdurehman ve hat dayîn.

Sewla bal kişand ser rola jinan li Bakur û Rojhilatê Sûriyeyê û got: "Li Bakur û Rojhilatê Sûriyeyê jin rola pêşengiyê dikin, gavên mezin avêtin û serketin bi dest xistin. Jinan rêxistina herî terorîst a ku cîhan tedît dikir, ji Kobanê heya Baxozê ya Dêrazorê têk bir."

Hevseroka Meclisa Partiya Sûriyeya Pêşerojê ya Minbicê Îbtîsam Ebdulqadir diyar kir ku tevî zextên dewletê jî xwepêşandana yekemîn ji aliyê xwendekarên zanîngehên Tehran û Esfehanê ve hatin lidarxistin û wiha domand: "Rewş ji kontrola rejîma serdest a Îranê derket, ji ber vê dest bi kiriyarên tundiyê kir. Die ncamê sivîl bûn qurbanî, hatin revandin û girtin. Ev pêkanîn hewlesta gel û jinan neda guhertin, berevajî vê yekê, serhildan bi dirûşma Jin, Jiyan, Azadî xurtir bû."

DÊRAZOR

Bi dehan şêniyên kantona Dêrazorê jî meşek li dar xist. Di meşê de bi navê Meclisa Sivîl a Dêrazorê hevseroka Gerînendetiya Bacan a Kantona Dêrazorê Rehma Elî axivî. Rehma diyar kir ku doza Jîna Emîn li ser asta Îran û cîhanê dengvedanek çêkir, her wih xwest ku der barê vê dozê de lêpirsîneke navneteweyî were destpêkirin û hesabê ji kujeran bê pirsîn.

Endama Melcisa Kombûna Jinan a Zenûbiya Seher El Mistefa got wê wêneya Jîna Emînî meşaleya serferaziyê bimîne.

Bi navê Meclisa Malbatên Şehîdan Esma El Xelef diyar kir ku meşa wan li dijî zilm û despotîzma li cîhanê peyama berxwedanê ye.

(sb/bb)

ANHA