Der barê sûcên çeteyan li Efrînê de daxuyaniyên şermezarkirinê hatin dayîn

Çeteyên ʹEmşatʹ ên dewleta Tirk a dagirker duh êvarê bi ser malên welatiyên gundê Kaxirê yê bajarê Mabeta yê Efrîna dagirkirî de girt, li welatiyan di nav de jinan da. 

Têkildarî mijarê Tevgera Civaka Demokratîk (TEV-DEM) a kantona Efrîn û Şehbayê daxuyaniyek da. Hevseroka Yekitiya Rewşenbîran a Kantona Efrîn û Şehbayê Medya Ebdo li kampa Serdem a bajarokê Ehdasê daxuyanî xwend.

Di daxuyaniyê de hat gotin ji 6 salan ve çeteyên dewleta Tirk a dagirker li dijî Efrînê sûcên hovane, siyaseta erda şewitî û guhartina demografîk pêk tînin. Qanûnên navneteweyî bin pê dikin. Li Efrînê ewlehî tune ye. Çeteyên ʹEmşatʹ gundê Kaxirê yê Mabeta dorpêç kir û li welatiyên gund da. Di encamê de welatî birîndar bûn.

Di daxuyaniyê de ev sûc hatin şermezarkirin û bang li gelê hundir û derve hat kirin ku li dijî van sûcan derkevin.

TEBQA

Nivîsgeha Jinan a Meclisa Malbatên Şehîdan a kantona Tebqayê li pêş avahiya xwe daxuyaniyek da. Hevseroka Meclisa Malbatên Şehîdan a bajarê Mensora daxuyanî xwend.

Di daxuyaniyê de sûcên dewleta Tirk a dagirker û çeteyên wê li dijî welatiyên Efrînî hatin şermezarkirin û hat gotin gunehê şêniyan ew e ku daxwaza jiyîn û xebitînê kirine. Lê çeteyan li wan da û revandin.

Di daxuyaniyê de banga derxistina çeteyan ji Efrînê û jinûve ewlehî û îstîqrar misoger bin hat kirin.

Koordînasyona Jinan a Rêveberiya Xweseriya Demokratîk a Kantona Tebqayê li pêş Navenda Çand û Hunerê daxuyaniyek da. Berdevka Komîteya Jinan a Meclisa Sivîl a Tebqayê Heyfa Betoşî daxuyanî xwend.

Di daxuyaniyê de hat diyarkirin ku piştî serketinên bi rêya projeya Rêveberiya Xweser hatine kirin, faşîsta Tirk şerê vê projeyê û gelê herêmê kir. Ji wan êriş û şeran jî dagirkirina Efrînê, koçberkirina xelkê wê, dizîn û talankirina xêr û bêrên wê ye.

Her wiha hate destnîşankirin ku jinên Tebqayê bi hemû pêkhateyên xwe teqezî bi bilindkirina têkoşînê dikin ku sûcên dewleta Tirk a dagirker û çeteyên wê aşkera bikin, piştgiriyê didin berxwedana jinên Efrînê.

MINBIC

Meclisa Kombûna Jinan a Zenûbiya ya kantona Minbicê têkildarî şermezarkirina sûcên dewleta Tirk a dagirker û çeteyên wê li dijî welatiyên gundê Kaxirê yê Efrîna dagirkirî daxuyaniyek da.

Di daxuyaniyê de hat gotin êriş û sûcên we bi armanca temamkirina planên wê yên qirêj li dijî gelên azadixwaz û jinan e. Ev yek îsrara berxwedan û têkoşînê li dijî tevahî şêweyên tundî û çewisandina li ser jinan xurt dike.

ANHA

 ŞEHBA