Bi boneya rojbûna Rêber Apo pîrozbahiyên dîrokî hatin lidarxistin

Bi hezaran şêniyên bajar û bajarokên Herêma Bakur û Rojhilatê Sûriyeyê û Helebê rojbûna Rêber Abdullah Ocalan (4’ê Nîsanê) bi coşeke mezin pîroz kir.

ROJANE

4 nîsan, 2025 22:40

NAVENDA NÛÇEYAN

Li bajarê Helebê li pêşiya Parka Zarokên Şehîdên Efrînê ya herêma Şiqeyêf bi dirûşma “4’ê Nîsanê vejîna azadiya jinan û gelan e” şahiyek hat organîzekirin. Di şahiyê de bi sedan şênî, nûnerên partiyên siyasî, saziyên sivîl û tevgerên jinan amade bûn.

Bi navê Însiyatîfa Azadiya Rêber Abdullah Ocalan a Sûriyeyê Osman Şêx Îsa diyar kir ku Rêber Abdullah Ocalan heqîqeta Kurdistana mêtingeh aşkera kir û bingehên rizgarkirina wê danîn û gelê Kurd bi pêş xist.

Li bajarê Amûdê, li xwaringeha Beylesan şahiyek bi beşdariya sedan şêniyên bajêr û gundên wî û koçberên Efrîn û Şehbayê hat lidarxistin.

Di şahiyê de bi navê Meclisa Malbatên Şehîdan Sewsen Hisên daxuyaniyek xwend. Di daxuyaniyê de banga pêkanîna azadiya fîzîkî ya Rêber Abdullah Ocalan hat kirin. Bi navê Kongra Star jî Mura Zoro peyamek xwend û tê de hat diyarkirin ku rojbûna Rêber Abdullah Ocalan rojbûna tevahî cîhanê ye.

Li bajarê Dirbêsiyê bi heman boneyê daxuyaniyek ji aliyê Meclisa Malbatên Şehîdan hat xwendin, her wiha li Goristana Şehîd Rustem Cûdî ya gundê Berkevirê dar hatin çandin û li parka Şehîd Zevîn şahiyeke girseyî hat lidarxistin.

Endama Koordînasyona Kongra Star Jiyan Hisên axivî û 4’ê Nîsanê li gelan pîroz kir. Bi navê Yekitiya Jinên Ciwan Nûr Ebas jî diyar kir ku rojbûna Rêber Abdullah Ocalan destpêka qonaxeke nû ya têkoşînê ye.

Li bajarê Dêrikê jî bi sedan şênî li parka Dîcle beşdarî şahiyeke girseyî bûn. Di şahiyê de peyamek bi navê Meclisa Malbatên Şehîdan ji hêla Sûad Mistefa ve hat xwendin. Piştre komên hunerî berhemên xwe yên hunerî pêşkêş kirin.

Li bajarê Qamişlo jî bi hezaran şênî di şahiya li Parka Azadî de beşdar bûn. Li wir berdevka Kongra Star Rîhan Loqo 4’ê Nîsanê li gelan pîroz kir û got: “Rojbûna Rêbertî rojbûna tevahî mirovahiyê ye.”

Li bajarê Hesekê Kongra Star şahiyeke mezin li parka 4'ê Nîsanê li dar xist. Di şahiyê de bi hezaran şênî beşdar bûn.

Endama Koordînasyona Kongra Star Nahid Silêman 4'ê Nîsanê pîroz kir û got: "Îro ji bo tevahî gelan cejn e."

Her wiha Losnak Kaboryan jî got: "Rêber Abdullah Ocalan ji bo tevahî gelên herêmê tê koşiya."

Li bajarê Tirbespiyê şahiyek li parka 4’ê Nîsanê hat lidarxistin. Di şahiyê de bi navê rêxistinên jinan ên kantona Cizîrê Şaha Xelîl axivî û got: “Rojbûna Rêber Abdullah Ocalan rojbûna gelên bindest û azadîxwaz e."

Piştre koma şehîd Xebat a stranan û koma şehîd Avzem a govendê hunerên xwe pêşkêş kirin. Di dawiya şahiyê de hunermendan stranên Kurdî û Erebî pêşkêş kirin.

Tevahî çalakî bi stran û govendan, her wiha bi banga azadiya fîzîkî ya Rêber Abdullah Ocalan, bi dawî bûn.

(ekîb/fr)

ANHA

QAMIŞLO

AMÛDE

DÊRIK

DIRBÊSIYÊ

HELEB

HESEKÊ

TIRBESPIYÊ