‘Aşkerakirina çarenûsa dîlgirtiyan mafê malbatên wan e’

Meclisa Malbatên Şehîdan a bajarê Hesekê têkildarî şervan û sivîlên di dema şer de ji aliyê hikumeta demkî ya Sûriyeyê ve hatine girtin, daxuyaniyek da.

Daxuyanî bi amadebûna malbatên şehîdan li pêşiya avahiya meclisê hat xwendin. Endama Komîteya Jinan a Meclisa Malbatên Şehîdan Necah Qewas bi zimanê erebî û endamê Nivîsgeha Arşîvê ya meclisê Mihemed Osman bi zimanê kurdî daxuyanî xwend.

Di daxuyaniyê de hate gotin, mijara dîlgirtiyên li gel hikumeta demkî ya Sûriyeyê ne tenê dosyeyeke siyasî yan jî kaxizeke bazirganiyê ye, lê dozeke mirovî û exlaqî ye ku bandorê li wijdanê her malbatekê dike.

Her wiha hate diyarkirin ku berdewama girtina dîlan di şert û mercên ku kêmî pîvanên dadperwerî û qanûnên navneteweyî binpêkirineke aşkera ya mafên mirovan e.

Meclisê di daxuyanihê de bang li hikumeta dekmî ya Sûriyeyê û aliyên peywendîdar kir ku bi lez û bez hemû dîl û girtiyên li cem xwe azad bikin û çarenûsa windayan bê şert û merc aşkera bikin. Bang li hemû aliyên navneteweyî yên aktîf, rêxistinên mirovî û Rêxistina Xaca Sor a Navneteweyî jî hat kirin ku erkên xwe yên qanûnî û exlaqî bi cih bînin û zexteke cidî bikin  da ku cihên dîlan û werin naskirin û silametiya wan a bedenî û derûnî were misogerkirin.

Di daxuyaniyê de hate destnîşankirin ku aşkerakirina çarenûsa dîlgirtiyan mafekî pîroz ê malbatên wan e û hate gotin, dê li pişt doza girtiyên xwe bisekinin heta ku vegerin nava malbatên xwe.

(bb)

ANHA