Apê Mûsa li ser gora xwe hat bîranîn

Rojnameger û nivîskar Apê Mûsa (Mûsa Anter) ê ku di 20‘ê îlona 1992‘yan de li kolana 442‘yan a taxa Cumhuriyetê ya navçeya Bajarê Nû ya Amedê ji aliyê JÎTEM‘ê ve hatibû qetilkirin, bi pêşengtiya Komeleya Rojnamegeran a Dîcle Firatê (DFG) û MEBYA-DER‘ya Mêrdînê ve li ser gora xwe ya li gundê Sitîlîleyê yê navçeya Nisêbîn a Mêrdînê hat bîranîn.

Piştî rêzgirtina ji bo şehîdên Çapemeniya Azad, kurê Mûsa Anter, Dîcle Anter axivî û got ku vaye 34 salan in Mûsa Anter nehatiye jibîrkirin û wiha axivî: “Dîroka Çapemeniya Azad xwe dispêre dîrokek dirêj. Di vê dîrokê de Apê Mûsa xwedî cihek girînk e. Bavê min tovek çand û îro ev tov mezin bûye.”

Piştî Dîcle Anter, Parlementerê DEM Partiyê yê Mêrdînê Kamûran Tanhan destnîşan kir ku Mûsa Anter jiyana xwe fedaî gelê Kurd kiriye û wiha got: “Gotinên te, nivîsên te wê hertim bijîn û rê nîşanî me bidin. Rehet rakeve şopdarên te ala te.‘‘

Hunermend Mazlûm bîranîn xwe yên bi Mûsa Anter re vegot û bîranîn bi stranên Koma Rengîn bi dawî bû.

Hevseroka DFG‘ê Kesîre Onel diyar kir ku Mûsa Anter li gel Çapemeniya Azad dijî û wiha axivî: “Îro Mûsa Anter di hişê me hemûyan de ye. Xebatkarên Çapemeniya Azad di şertên giran de mîrateya Mûsa Anter hildigire.”