Jinên Hesekê piştgirî da xwepêşanên Siwêdayê

Nivîsgeha Jin a Meclisa Sûriya Demokratîk (MSD) a Hesekê bi çalakiyekê li pêş navenda meclisê ya li taxa Umran a bajêr piştgiriya xwe ji xwepêşandanên Siwêdayê re nîşan da.

Endamên jin ên MSD′ê, Partiya Pêşketin û Guhartina Neteweyî ya Demokratîk û Meclisa Jinan a Sûriyeyê pankartên "Em piştgiriyê didin azadîxwazên Siwêdayê", "Azadî ji xelkê Siwêdayê re", "Jin, Jiyan, Azadî" hildan.

Di çalakiyê de hevseroka Komîteya Jin a Meclisa Civaka Ermen Losnak Kaforiyan axivî û wiha got: "Em di Sûriyeyê de demeke dirêj di rewşa aloz, bêewlehî, bêîstîqrarî û şer de dijîn. Lê berxwedana Şoreşa Rojava û dengvedana wê li cîhanê hişt jinên li Siwêdayê di heman rê û berxwedanê de bimeşin."

Losnak wiha domand: "Şoreşa jin îor li tevahî cîhanê û li Sûriyeyê belav dibe. Jinên Siwêdayê li ser şopa jinên Bakur û Rojhilatê Sûriyeyê dimeşin."

Losnak piştgiriya xwe ji jinên Siwêdayê re anî ziman û wiha pê de çû: "Em piştgiriyê didin jinên berxwedêr ên Siwêdayê û em ê ji bo serketina vê şoreşê bibin yek dest û yek deng."

Li Siwêdayê ji 20′ê Tebaxê ve xwepêşandan hene. Xwepêşandêran rêyên navendên Partiya Baasê û rêyên sereke girtin û banga guhartina siyasî û hilweşîna rejîmê kirin.

(fr)

ANHA