Di 15 rojan de nêzî 400 koçber bi îltihaba rovikan ketin

Di çend hefteyên borî de pileyên germahiyê li tevahî herêmên Bakur û Rojhilatê Sûriyeyê zêde bûn û li kantona Şehbayê ku tê de 5 kamp hene; Berxwedan, Serdem, Efrîn, Şehba û Veger û koçberên Efrînê lê dijîn, pileya germahiyê gihaşt 48 dereceyan.

Bi deh hezaran koçberên Efrînê ji zêdetirî 5 salan ve, piştî dagirkirina kantona Efrînê ji hêla dewleta Tirk a dagirker ve, di kampan de dijîn. Bi sedema dorpêça hikumeta Şamê li ser Şehba û êrişên dewleta Tirk a dagirker ên bênavber rewşa koçberan zehmet e.

Di encama bilindbûna germahiyê û nebûna kehrebe û rêbazên sarkirinê mîna baweşîn û avsarkê, bi sedan zarok û kal û pîr li kampan bi nexweşiyên îltîhaba rovikan, tagirin û navçûnê ketine. Her wiha xeriqîn jî zêde bûye.

Li gorî Meclisa Tenduristiyê ya Kantona Efrîn û Şehbayê, nexweş rojane serdana navendên tenduristiyê, Nexweşxaneya Avrîn û nuqteyên tibî dikin û di 2 hefteyên dawîn ên Tîrmehê de 397 rewşên îltîhaba rovikan û tagirtinê hatine qeydkirin.

Hemşîreya nuqteya tibî ya Heyva Sor a Kurd Fereh Ehmed li ser vê yekê axivî û wiha got: "Bilindbûna pileyên germahiya îsal ne normal e. Wê yekê hişt nexweşî di nava koçberên Efrînê de, bi taybet zarok û kal û pîran zêde be."

Fereh wiha domand: "Ji rewşên herî zêde serdana nuqteya tibî dikin, nexweşên îltîhaba rovikan û tagirtinê ne. Divê baldarî û şopandin hebe da ku ev nexweşî bi pêş nekevin û nexweşiyên din bi xwe re çênekin."

Li nuqteya tibî ya ku Fereh Ehmed lê dixebite, rojane 60 kes serdanê dikin.

Fereh bang li şêniyan kir ku zarokên xwe bernedin derve û di saetên nîvro de li ber tavê negerin.

Hikumeta Şamê jî nahêle madeyên bingehîn û sotemeniyê ji bo pêxistina jenetorên kehrebeyê derbas bibin. Li kêleka wê jî dewleta Tirk a dagirker û çeteyên wê êrişî navçe û gundên kantona Şehbayê dikin.

(fr)

ANHA