'Fikrên Rêber Abdullah Ocalan çavkaniya têkoşîna azadiyê ye'

Ji zêdetirî 24 salan ve, tevî tecrîda giran û qedexekirina hevdîtinên parêzer û malbatê, Rêber Abdullah Ocalan xwedî vîneke xurt e û di girtîgeha Îmraliyê de li ber xwe dide. Ev têkoşîna wî bi xwedîderketina bi milyonana kurdan û dostên wan li fikrê wî tacîdar bû.

Endamên Tevgera Ciwanên Şoreşger a Sûriyeyê û Yekitiya Jinên Ciwan şaxê navçeya Çil Axa ya kantona Qamişlo, destnîşan dikin ku ew dev ji fikrê û felsefeya Rêber Abdullah Ocalan bernadin. Her wiha siyasetên tecrîdê û sûcan ên li Îmraliyê diqewimin, red kirin.

Serdozgeriya Yekemîn a Burdayê tevî ku dema biryra qedexeyê ya berê neqediyaye, lê di 15`ê Adarê de biryareke nû stend ku nabe tu kes serdana girtîgeha Îmraliyê bike.

Yunis Hacî got: “Em hêza birêxistinkirin û hevgirtina xwe ji fikr û felsefeya Rêber Abdullah Ocalan digirin ku li ser bingeha mirovê azad yê birêxistinkirî ava bûye. Ji bo ku civakê azad bikin, destkeftiyên şoreşa Bakur û Rojhilatê Sûriyeyê ku bi saya fedekariyên ciwanên wê hatine bidestxistin, biparêzin.”

DIVÊ NIRXANDINÊN RÊBER ABDULLAH OCALAN WERIN XWENDIN

Hacî diyar kir ku qirkirina bedenî û çandî ji aliyê dewleta Tirk a dagirker û dijminên rêgeza demokratîk ve li dijî ciwanan berdewam e û wiha pê de çû: “Ji ber wê divê em baldar bin, nirxandin û perspektîfên Rêber Abdullah Ocalan ên têkildarî zanakirina ciwanan bixwînin.”

Hacî soz da ku têkoşînê berdewam bike ta ku azadiya fîzîkî ya Rêber Abdullah Ocalan bi dest dikeve û got: “Azadiya wî azadiya me ye.”

Jina ciwan bi navê Fatin Ehmed Hesen jî got fikrê Rêber Abdullah Ocalan dibistaneke ku ciwan jê hêzê digirin da ku têkoşînê li ser rêya azadiyê berdewam bikin û ev li gotinên xwe zêde kir: “Em dê şopdarên fikrên wî bin ku rêya xilasiya ji aloziyan e.”

Ciwanê bi navê Mihemed Esker jî diyar kir ku ew amade ne her tiştî bikin ji bo ku tecrîd bi dawî bibe û azadiya fîzîkî ya Rêber Abdullah Ocalan pêk were. Ji bo wê, Esker banga hevgirtinê kir.

Jina ciwan a bi navê Sabrîn Iliyas got ji bo avakirina civakeke azad û demokratîk û ji bo parastina destkeftiyên şoreşa herêmê, pêwîst e xwedî li fikrên Rêber Abdullah Ocalan derkevin.

(dm/şx)

ANHA