​​​​​​​Panorama hefteyê: Beşdarbûna El Esed di lûtkeya erebî de ji bo Qeterê binkeftin e

‘SIÛDÎ, ZELENSKY BEŞDARÎ LÛTKEYÊ KIR DA KU REXNEYÊN LI SER BEŞDARKIRINA ESAD SIVIK BIKE’

Rojnameya Ereb têkildarî Lûtkeya Ereban a li Cedayê û beşdarbûna serokkomarê Ukraynayê Zelensky di lûtkeyê de wiha nivîsî: “Erebistana Siûdî hevsengî di navbera amadebûna serokê Sûriyeyê Beşar Esad li Lûtkeya Ereban a Cedayê û vexwendina serokê Ukraynayê Volodymyr Zelensky bo vekirina lûtkeyê û pêşkêşkirina axaftinekê çêkir, da ku bi vê yekê bersiva rexneyên Amerîka û welatên rojavayî yên li ser vegerandina Sûriyeyê li Komkara Ereban bide."

Di dewama şîroveya rojnameya El Ereb de hate diyarkirin: "Li gorî çavdêran beşdarbûna Zelensky di lûtkeyê de bi vê armancê ye ku Erebistana Siûdî bide nîşandan ku ne li kêleka tu aliyekî, nemaze Rûsyayê ye. Ji ber ku Dewletên Yekbûyî yên Amerîkayê (DYA) wê tawanbar dike ku li kêleka serokê Vladîmîr Pûtîn disekine û şerê li Ukraynayê bi kêmkirina hilberîna petrolê û bilindkirina buhayan fînanse dike.

Nêzîkatiyên di Lûtkeya Cedayê de derketin gihaştin asteke nû, serokê Sûriyeyê Beşar El Esed û emîrê Qeterê Şêx Temîm Bin Hemed Al Sanî dest dan hev. Ev dide nîşandan ku Dewhayê dê mîna dewletên Kendavê têkiliyên xwe bi Şamê re aktîf bike.”

'TIRKIRIYE BER BI TURA DUYEMIN A HILBIJARTINAN VE'

Rojnameya El Exbar a Lubnanê jî diyar kir ku encamên destpêkê yên dengan dê “dawiyek baş” ji bo Erdogan neynin. Rojnameyê bal kişand ku “xala herî girîng ew e ku tu namzetî zêdetirî 50`ê dengan bi dest nexist, ev jî li gorî qanûna hilbijartinan tê wateya tûreke duyemîn ku dê piştî du hefteyan bê lidarxistin. Eger ev yek pêk hat jî dê ji bo Erdogan ne baş be, ji ber ku dê cara yekemîn be ku Erdogan di tûra yekemîn de bi sernakeve.

Di tûra duyemîn de jî dibe ku encam ne bi dilê serokê heyî bin. Ihtimalek din jî heye ku Sinan Ogan ku ji sedî 5`ê dengan bi dest xistin, piştgiriyê bide Kiliçdaroglu û bang li alîgirên xwe bike ku raya xwe bidin namzetê opozîsyonê.”

‘ÎSTÎFAKIRINA BAŞAXA JI SEROKATIYA HIKUMETA LÎBYAYÊ NE ZELAL E′

Rojnameya El Beyan li ser rewşa Lîbyayê wiha nivîsand: "Duh, Meclisa Nûneran li navenda xwe ya Tebreqê civînek li dar xist û wezîrê darayî Usama Hemade li şûna Fethî Başaxa ji bo serokatiya Meclisa Wezîran erkdar kir. Başaxa ji kar hate dûrxistin û dê lêpirsîn der barê wî de bê kirin.

Berdevkê serokatiya Meclisa Nûneran Ebdullah Belîheq got meclisê bi piranî dengan li ser sekinandina Başaxa û veguhastina ji lêpirsînê re, erê kir. Her wiha li şûna wî wezîrê darayî Usama Hemad erkdar kir ku bibe serokatê hikumetê.

Başaxa tu gotin li ser biryarê nekirin, lê dema parlamento li ser biryara îstîfakirina wî kom bû, Başaxa biryar da ku cîgirî wî Elî Ferec El Qetranî Meclisa Wezîran bi rê ve bibe.

Li ser biryara îstîfakirina Başaxa nixumandin û rewşeke nezelal heye. Başaxa niyet dikir ku di çend rojên bê de ji erka xwe îstîfa bike. Lê di navbera wî û serokê hikumeta Wehde El Wetenî Ebdulhemîd El Debîbe de lihevkirin çêbûn.

Her wiha li ser mayîna yek hikumetê, anku hikumeta Debîbe ku xebata xwe li Terablusê bike, li hev kir."

Civînên Başaxa bi Debîbe re gelek aliyên siyasî û Meclisa Nûneran bi hêrs kirin. Meclisa Nûneran hîna red dike ku hikumeta Debîbe nas bike."

‘NY: PÊDIVIYA SÛDANÊ BI 3 MILYAR DOLARÎ JI BO ALÎKARIYA MIROVÎ HEYE′

Rojnameya El Beyan jî li ser rewşa Sûdanê wiha nivîsî: "NY′yê eşkere kir ku nêzî 25 milyon sûdanî pêdiviya xwe bi alîkariyên mirovî yên awarte heye û ew alîkarî nêzî 3 milyar dolar e.

NY′yê da zanîn ku ew texmîn dike ku pêdivî bi 2.56 milyar dolarî heye ku alîkariyê li hundirê xaka Sûdanê bike.

NY′yê di heman demê de destnîşan kir ku ji bo welatiyên revîne derveyî welat, pêdivî bi 470 milyon dolarî heye.

Serokê Nivîsgeha Kar û Barên Mirovî ya NY′yê Ramesh Raja Sangam duh got pêdiviya plana navnetweyî ya ji bo alîkariya mirovî li Sûdanê bi 2.56 milyar dolar heye; ji bo mexdûrên hundirîn û ji bo kesên revîne derveyî welat pêdivî bi 470.4 milyon dolarî heye."